Times of Maharashtra Desk : मुंबई महानगरपालिका निवडणुकीच्या पार्श्वभूमीवर सर्वच राजकीय पक्ष जोरदार तयारीला लागले आहेत. यंदाची महापालिका निवडणूक उद्धव ठाकरे आणि राज ठाकरे यांच्यासाठी अस्तित्वाची लढाई ठरण्याची चिन्हे आहेत. दुसरीकडे, कोणत्याही परिस्थितीत मुंबई महापालिकेवर सत्ता मिळवायची, असा निर्धार भाजपने केला असून त्यासाठी आक्रमक रणनिती अवलंबली जात आहे.भाजपकडून मनसे आणि ठाकरे गटातील नाराज नेत्यांना आपल्या गळाला लावण्याचे प्रयत्न सुरू असल्याची चर्चा राजकीय वर्तुळात आहे. हा धोका ओळखून राज ठाकरे आणि उद्धव ठाकरे यांनी संभाव्य फोडाफोड रोखण्यासाठी एक खास आणि काटेकोर रणनीती आखली आहे.
युतीची घोषणा अर्ज भरण्याच्या आदल्या दिवशी
मुंबई महापालिकेसाठी 23 डिसेंबरपासून उमेदवारी अर्ज भरण्यास सुरुवात होणार आहे. मनसे आणि ठाकरे गटाची युती झाल्यास, प्रत्येक प्रभागात एकाच उमेदवाराला संधी मिळणार आहे. त्यामुळे उमेदवारी न मिळालेल्या इच्छुकांकडून बंडखोरी किंवा भाजपमध्ये प्रवेशाचा धोका वाढू शकतो. हा धोका टाळण्यासाठी राज आणि उद्धव ठाकरे उमेदवारी अर्ज भरण्याच्या अगदी आदल्या दिवशी युतीची अधिकृत घोषणा करणार आहेत. 22 किंवा 23 डिसेंबर रोजी मुंबईत भव्य मेळाव्याचे आयोजन करून ठाकरे बंधू संयुक्तपणे युतीची घोषणा करतील, अशी माहिती सूत्रांनी दिली आहे. त्यामुळे नाराज नेत्यांना दुसऱ्या पक्षाशी वाटाघाटी करण्यासाठी फारसा वेळ मिळणार नाही आणि संभाव्य बंडखोरीवर नियंत्रण राहील, असा अंदाज आहे.
उमेदवारांची नावे शेवटच्या क्षणी जाहीर होणार
युतीनंतर जागावाटप निश्चित झाल्यावर उमेदवारांची नावे लगेच जाहीर केली जाणार नाहीत. अंतिम उमेदवारांना पक्षाकडून थेट फोन करून कळवण्यात येईल आणि त्यानंतर अधिकृत एबी फॉर्म दिला जाईल. उमेदवारांची नावे शेवटच्या क्षणी जाहीर केल्यास बंडखोरांना उमेदवारी अर्ज भरणे किंवा दुसऱ्या पक्षात जाणे कठीण होईल, ही या रणनीतीमागची भूमिका आहे.
जागावाटप जवळपास निश्चित
मनसे-ठाकरे गटाच्या युती आणि जागावाटपाबाबत ‘शिवतीर्था’वर ठाकरे गटाचे नेते संजय राऊत आणि अनिल परब यांनी चर्चा केली. या दोन्ही नेत्यांनी राज ठाकरे यांच्याशीही संवाद साधला आहे. राज ठाकरे आज मनसेच्या प्रमुख नेत्यांशी सविस्तर चर्चा करणार असून, गुरुवारी ठाकरे बंधू युतीची औपचारिक घोषणा करतील, अशी माहिती मनसेच्या एका ज्येष्ठ नेत्याने दिली.
दोन्ही पक्षांतील जागावाटप जवळपास अंतिम टप्प्यात असून, उद्धव आणि राज ठाकरे एकत्रितपणे याबाबतची घोषणा करतील, असेही स्पष्ट करण्यात आले आहे.मुंबई महापालिकेच्या निवडणुकीत भाजपच्या वाढत्या ताकदीसमोर ठाकरे बंधूंची ही संयुक्त खेळी कितपत यशस्वी ठरते, याकडे संपूर्ण महाराष्ट्राचे लक्ष लागले आहे.
