निफाड (प्रतिनीधी उत्तम जाधव) : नाशिक निफाड तालुक्यातील धारणगाव खडक येथे स्वतःला महाराज म्हणून संबोधत दैवी शक्तीच्या नावाखाली महिलांची फसवणूक व लैंगिक शोषण केल्याचा आरोप असलेल्या भोंदू बाबा महेशगिरी ऊर्फ महेश दिलीप काकडे (वय ३१) याच्या अडचणीत आणखी वाढ झाली आहे. निफाड येथील जिल्हा व सत्र न्यायालयाने त्याचा जामीन अर्ज फेटाळून लावत महत्त्वपूर्ण निर्णय दिला आहे. हा आदेश प्रभारी जिल्हा व सत्र न्यायाधीश मा. के. आर. जोगळेकर यांनी सोमवार, दि. ११ मे रोजी दिला.
सदर प्रकरणात आरोपीविरुद्ध गंभीर स्वरूपाचे आरोप करण्यात आले आहेत. तपास यंत्रणेकडून न्यायालयात मांडण्यात आलेल्या माहितीनुसार, आरोपीने दैवी शक्ती, अध्यात्म आणि चमत्काराच्या नावाखाली अनेक महिलांना विश्वासात घेऊन त्यांची आर्थिक व मानसिक फसवणूक केली असल्याचा आरोप आहे. तसेच काही महिलांचे लैंगिक शोषण झाल्याचाही आरोप प्रकरणात नमूद करण्यात आला आहे.
न्यायालयाने गुन्ह्याचे गंभीर स्वरूप, तपासावर होणारा संभाव्य परिणाम आणि पुढील काळात आणखी तक्रारदार समोर येण्याची शक्यता लक्षात घेत आरोपीचा जामीन अर्ज फेटाळला. त्यामुळे महेशगिरी याचा मध्यवर्ती कारागृहातील मुक्काम आणखी वाढला आहे. या निर्णयामुळे परिसरात मोठी चर्चा सुरू असून, पोलिस तपास अधिक वेगाने सुरू आहे.
