Times of Maharashtra Desk: आर्थिक संकटात सापडलेल्या पाकिस्तानला संयुक्त अरब अमिरातीने मोठा धक्का दिला आहे. पाकिस्तानी नागरिकांना नियमित व्हिसा देणं UAE ने अनौपचारिकपणे थांबवलं आहे. या निर्णयामागे पाकिस्तानी पर्यटकांकडून UAE मध्ये वाढलेल्या गुन्हेगारी कारवाया आणि बेकायदेशीर कामं हे मुख्य कारण असल्याचं पाकिस्तानच्या वरिष्ठ अधिकाऱ्यांनीच मान्य केलं आहे. सौदी अरेबियानेही यापूर्वी काही पाकिस्तानी नागरिकांच्या व्हिसावर निर्बंध लादले होते.
नेमकं प्रकरण काय ?
डॉन वृत्तपत्राच्या वृत्तानुसार, UAE ने डिप्लोमॅटिक आणि ब्लू पासपोर्ट वगळता, सर्व पाकिस्तानी नागरिकांसाठी नियमित व्हिसा देणं अनौपचारिकरित्या स्थगित केलं आहे. पाकिस्तानच्या गृह मंत्रालयाचे अतिरिक्त सचिव सलमान चौधरी यांनी सिनेट फंक्शनल कमिटी ऑन ह्यूमन राइट्सच्या बैठकीत या माहितीला दुजोरा दिला. पाकिस्तानी पर्यटक UAE मध्ये गुन्हेगारी कारवायांमध्ये सामील असल्याच्या वाढत्या चिंतेमुळे हा निर्णय घेण्यात आल्याचं त्यांनी सांगितलं. व्हिसासाठी सादर केलेल्या शैक्षणिक कागदपत्रांची सत्यता आणि इतर कागदपत्रांमधील त्रुटींवरही UAE ने चिंता व्यक्त केली आहे.
सौदी अरेबियाकडूनही कारवाई
UAE प्रमाणेच, सौदी अरेबियानेही काही दिवसांपूर्वी पाकिस्तानी नागरिकांना व्हिसा देण्यावर निर्बंध लादले आहेत. सौदी अरेबियात पाकिस्तानी नागरिकांकडून भिक मागण्याच्या घटनांमध्ये मोठ्या प्रमाणात वाढ झाल्यामुळे हा निर्णय घेण्यात आला आहे. सौदी अरेबियाने या वर्षाच्या सुरुवातीला ४,७०० हून अधिक पाकिस्तानी नागरिकांना विशेषतः मक्का आणि मदिना येथून भिक मागताना पकडून त्यांना तडीपार केलं होतं. पाकिस्तानी अधिकाऱ्यांच्या विनंतीनंतर, दोन्ही देशांनी पाकिस्तानी पासपोर्टवर संपूर्ण बंदी घालण्याचा निर्णय तूर्तास टाळला आहे, मात्र पाकिस्तानी नागरिकांना व्हिसा मिळणं अत्यंत कठीण झालं आहे.
पाकिस्तानवर परिणाम
UAE आणि सौदी अरेबिया हे दोन्ही देश पाकिस्तानसाठी रोजगार आणि परकीय चलन मिळवण्याचे मोठे स्रोत आहेत. लाखो पाकिस्तानी नागरिक या देशांमध्ये काम करतात. या व्हिसा निर्बंधांमुळे पाकिस्तानच्या अर्थव्यवस्थेवर आणि नागरिकांच्या रोजगारावर मोठा नकारात्मक परिणाम होण्याची शक्यता आहे. दोन प्रमुख मुस्लिम राष्ट्रांनी पाकिस्तानी नागरिकांवर निर्बंध लादल्यामुळे पाकिस्तानच्या आंतरराष्ट्रीय प्रतिमेला आणखी धक्का बसला आहे.
