मृतांमध्ये प्रवीण मित्तल (वय ४२) हे टॅक्सी चालक होते. त्यांच्यावर अंदाजे १५ ते २० कोटी रुपयांचे कर्ज होते. कुटुंबाची हिमाचल प्रदेशातील स्क्रॅप फॅक्टरी मोठ्या आर्थिक तोट्यामुळे बँकेने जप्त केली होती. परिणामी, मित्तल कुटुंबाने पंचकुला सोडून देहरादूनमध्ये स्थलांतर केले होते आणि तेथे अलिप्त जीवन जगत होते.
या दुर्दैवी घटनेच्या आधी कुटुंबाने बागेश्वर धाम येथील एका धार्मिक कार्यक्रमात सहभाग घेतला होता. कार्यक्रमानंतर ते पंचकुलामध्ये आले व सेक्टर २७ परिसरात कार पार्क केली. स्थानिक रहिवासी पुनीत राणा यांना कारमध्ये संशयास्पद हालचाली दिसल्यावर त्यांनी पोलिसांना याची माहिती दिली. कार उघडल्यावर सर्व सदस्य मृतावस्थेत सापडले असून, उलट्यांचे चिन्ह आढळल्यामुळे विष प्राशनाचा अंदाज वर्तवण्यात आला आहे.
ही घटना समोर येताच संपूर्ण परिसरात खळबळ उडाली असून, स्थानिक नागरिकांनी “कोणीही वेळेवर मदत केली नाही” अशी प्रतिक्रिया दिली आहे. पोलिसांनी घटनास्थळी तपास सुरू केला असून मृत्यूमागील नेमके कारण शोधण्याचे प्रयत्न सुरू आहेत.
