ब्रह्मपुरी (प्रतिनिधी रुपेश देशमुख) : गांगलवाडी-एकारा मार्गावरून सुरू असलेल्या गोवंशाच्या अवैध तस्करीवर ब्रह्मपुरी पोलिसांनी धडक कारवाई करत मोठा सापळा रचला. या कारवाईत दोन पिकअप वाहने जप्त करण्यात आली असून, त्यामधून अमानुषपणे कोंबून नेण्यात येणाऱ्या २० गोवंशीय जनावरांची सुटका करण्यात आली. जप्त मुद्देमालाची एकूण किंमत सुमारे ९ लाख ४५ हजार रुपये असल्याची माहिती पोलिसांनी दिली.
या प्रकरणी पोलिसांनी भूषण जम्पलवार (रा. चंद्रपूर), गणेश गोहणे, अमित कोवे आणि विकास कळसकर (सर्व रा. चिखली, ता. मूल) या चौघांना ताब्यात घेतले आहे. तसेच अकील कुरेशी (चंद्रपूर), रुपेश माहुरे आणि धनराज माहुरे (रा. नवेगाव खुर्द) यांच्याविरुद्ध प्राणी संरक्षण व प्राणी क्रूरता प्रतिबंधक कायद्यान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, संशयास्पदरीत्या गोवंश वाहतूक होत असल्याची गुप्त माहिती मिळाल्यानंतर गांगलवाडी-एकारा मार्गावर सापळा रचण्यात आला. तपासणीदरम्यान दोन पिकअप वाहने (MH49AT8332 आणि MH27DT1542) अडवून पाहणी केली असता, त्यामध्ये गोवंशीय जनावरे अत्यंत वाईट अवस्थेत कोंबून नेण्यात येत असल्याचे आढळून आले.
ही कारवाई पोलीस अधीक्षक आयुष नोपाणी, अपर पोलीस अधीक्षक ईश्वर कातकडे आणि उपविभागीय पोलीस अधिकारी दिनकर ठोसरे यांच्या मार्गदर्शनाखाली करण्यात आली. कारवाईत पोलीस निरीक्षक प्रमोद बानबले, पोलीस उपनिरीक्षक बालाजी चव्हाण, तसेच पोलीस कर्मचारी अरुण पिसे, रतन लेनगुरे, मिलिंद नैताम, अमोल लोनबले आणि शुभम लेडांगे यांनी सक्रिय सहभाग घेतला.
या प्रकरणाचा पुढील तपास ब्रह्मपुरी पोलीस करत आहेत.
