Pune Leopard Attack : अखेर नरभक्षक बिबट्या ठार; 20 दिवसांत घेतले होते तीन बळी…

Times of Maharashtra Desk, Pune : मागील  चार ते पाच दिवसांच्या प्रचंड जनक्षोभानंतर अखेर आज वनविभागाच्या पथकाला जुन्नर, आंबेगाव, शिरूर परिसरात दहशत माजवणाऱ्या नरभक्षक बिबट्याला ठार करण्यात यश आले आहे. काल रात्री उशिरा पिंपरखेड गावामध्ये गस्त घालत असताना ड्रोन कॅमेऱ्यामध्ये हा बिबट्या दिसला होता. त्यानंतर वनविभागाचे पथक ह्या बिबट्याला डार्ट मारून बेशुद्ध करण्यासाठी गेले असता, डार्टचा नेम चुकल्याने ह्या बिबट्याने वनविभागाच्या पथकावर प्रतिहल्ला केला. अखेर बचावात्मक उपाययोजना म्हणून पथकातील शार्प शूटर्सने दोन राऊंड फायर करून बिबट्याला ठार केले.

20 दिवसांत घेतले होते तीन बळी

शिरूर तालुक्यातील पिंपरखेड व परिसरामध्ये मागील वीस दिवसांमध्ये नरभक्षक बिबट्याच्या हल्ल्यामध्ये तीन बळी गेले. शिवन्या शैलेश बोंबे या सहा वर्षीय चिमुकलीचा, भागुबाई रंगनाथ जाधव या ब्याऐंशी वर्षीय वृद्धेचा, आणि २ नोव्हेंबर रोजी रोहन विलास बोंबे या तेरा वर्षीय मुलाचा या बिबट्याच्या हल्ल्यामध्ये दुर्दैवी मृत्यू झाल्याने मोठ्या प्रमाणात संताप उसळून जुन्नर,शिरूर, आंबेगाव व खेड तालुक्यामधील नागरिकांनी आंदोलन केले होते.

बेशुद्ध करण्याचा प्रयत्न अयशस्वी

मागील दोन दिवसांत या परिसरात ठीक ठिकाणी कॅमेरा ट्रॅप लावून बिबट्याचे भ्रमण मार्गावरील ठशांचे निरीक्षण करण्यात आले. त्यानंतर रात्री तीन थर्मल ड्रोनच्या माध्यमातून घटनास्थळी व परिसरामध्ये त्या नरभक्षक बिबट्याचा शोध घेतला असता घटनास्थळापासून सुमारे 400 मीटर अंतरावर बिबट्या दिसून आला होता. पथकाने त्याला बेशुद्ध करण्यासाठी डार्ट मारला परंतु, तो अपयशी ठरल्याने बिबट्या चवताळून प्रतिहल्ला करत असताना बंदूकधारी शार्प शूटर यांनी त्यावर रात्री 10.30 वाजताच्या सुमारास गोळी झाडल्याने हा सहा वर्षीय नर बिबट्या मृत झाला. त्यानंतर सदर नरभक्षक बिबट्याचे शव पिंपरखेड येथील ग्रामस्थांना दाखविण्यात आल्यानंतर सदर शव, शवविच्छेदना करिता माणिकडोह येथील बिबट निवारा केंद्रात हलविण्यात आले.

आंदोलनानंतर प्रशासनाला जाग 

वीस दिवसांमध्ये तीन मृत्यू झाल्यानंतर संतप्त नागरिकांनी 2 नोव्हेंबर रोजी वनविभागाच्या वाहनाला व पिंपरखेड येथील बेस कॅम्प इमारतीला आग लावली होती. तसेच दिनांक 3 नोव्हेंबर रोजी पुणे- नाशिक व बल्हे – जेजूरी महामार्ग सुमारे अठरा तास रोखून धरला होता. नागरिकांच्या आंदोलनानंतर वनसंरक्षक आशीष ठाकरे यांनी प्रधान मुख्य वनसंरक्षक वन्यजीव तथा मुख्य वन्यजीव रक्षक महाराष्ट्र राज्य यांची या बिबट्याला ठार करण्यासाठी परवानगी घेतली होती. यानंतर हा नरभक्षक बिबट्या जेरबंद अथवा ठार करण्यासाठी रेस्क्यू संस्था पुणेचे पशुचिकित्सक डॉ. सात्विक पाठक व शार्प शूटर जुबिन पोस्टवला, डॉ. प्रसाद दाभोळकर यांना पाचारण करण्यात आले होते.