पुणे (प्रतिनिधी): पुण्यातील काशीवाडीसारख्या दाट वस्तीत राहणाऱ्या एका सामान्य फळ विक्रेत्याच्या मुलीने आपल्या जिद्द आणि चिकाटीच्या जोरावर पोलीस दलात भरती होऊन घवघवीत यश संपादन केले आहे. आलिया गुलाम महंमद शेख असे या कर्तृत्ववान कन्येचे नाव असून, तिच्या या यशाबद्दल ‘मातंग एकता आंदोलना’च्या वतीने तिचा विशेष सत्कार करण्यात आला.
काशीवाडी भागात राहणारे गुलाम अहमद शेख आणि त्यांच्या पत्नी रुकसाना शेख यांना दोन मुली आणि एक मुलगा आहे. गुलाम शेख हे फळे विकून कुटुंबाचा उदरनिर्वाह करतात. अशा हलाखीच्या स्थितीतही त्यांनी अपार कष्ट करून आपल्या मुलांना शिक्षण दिले. त्यांच्या एका मुलीने वकिलीचे शिक्षण पूर्ण केले आहे, तर दुसरी मुलगी आलिया हिने अनेक अडचणींवर मात करत पोलीस दलात यशस्वीरीत्या प्रवेश मिळवला आहे. आपल्या मुलीच्या या यशामुळे केवळ कुटुंबाचीच नव्हे, तर अँग्लो-उर्दू गर्ल्स हायस्कूल आणि संपूर्ण काशीवाडी परिसराची मान अभिमानाने उंचावली असल्याची कृतज्ञ भावना तिचे वडील गुलाम शेख यांनी व्यक्त केली.
आलियाच्या या प्रेरणादायी यशाची दखल घेत मातंग एकता आंदोलन महाराष्ट्र राज्याचे कार्याध्यक्ष अविनाश रमेश बागवे यांच्या हस्ते तिचा नुकताच सत्कार करण्यात आला. यावेळी बोलताना बागवे यांनी आलियाचे कौतुक केले. ते म्हणाले की, “प्रभागातील अनेक तरुण-तरुणींना आलिया खेळाडू, पोलीस भरती आणि वैद्यकीय क्षेत्रातील करिअरबाबत मोलाचे मार्गदर्शन करते. त्यामुळे परिसरातील प्रत्येक कुटुंबाशी तिचे विश्वासाचे आणि जिव्हाळ्याचे नाते जोडले गेले आहे.”
या सत्कार समारंभाप्रसंगी हुसेन शेख, सुनील बावकर, भारत बाबर, कुमार आडगळे, सुरेश व्यास, सुनील साळवे, नौशाद खान, गवळी ताई यांच्यासह काशीवाडी परिसरातील महिला भगिनी आणि नागरिक मोठ्या संख्येने उपस्थित होते. एका सामान्य कुटुंबातील मुलीने मिळवलेले हे यश परिसरातील इतर तरुणांसाठी एक मोठा आदर्श ठरले आहे.
