गणेश नारंग; पिंपरी चिंचवड प्रतिनिधी: रहाटणी व श्रीनगर परिसरात सार्वजनिक स्वच्छतेचा बोजवारा उडवणाऱ्या नागरिकांच्या खिशाला आता चांगलीच कात्री लागत आहे. पिंपरी चिंचवड महापालिकेच्या ग क्षेत्रीय कार्यालयाच्या आरोग्य विभागाने मागील पंधरा दिवसांत सार्वजनिक ठिकाणी अस्वच्छता करणाऱ्यांवर कारवाई करत एकूण २२८ नागरिकांकडून तब्बल ₹1,27,200 इतका दंड आकारला आहे.
स्वच्छता नियमांचे उल्लंघन थेट दंडाकडे नेणार असल्याचे प्रशासनाने पुन्हा एकदा कारवाई करत दाखवून दिले आहे. रहाटणी, श्रीनगर, तापकीर चौक, नखाते चौक, रहाटणी फाटा, काळेवाडी फाटा तसेच तांबे रोड परिसरात ही कारवाई करण्यात आली.
वसूल केलेल्या दंडाची विभागवार माहिती
सार्वजनिक ठिकाणी कचरा फेकणे
२१७ नागरिकांकडून एकूण 91,200 रु. दंड
बंदी असलेल्या प्लास्टिकचा वापर (पहिला गुन्हा)
प्रत्येकी 5,000 प्रमाणे २ जण – एकूण 10,000 रु. दंड
डास उत्पत्तीस्थाने आढळल्याबद्दल (सोसायटी/हॉटेल/मॉल)
एकूण 10,000 रु. दंड
मोकळ्या जागेत कचरा टाकणे
प्रत्येकी 2,000 प्रमाणे ४ कारवाई – एकूण 8,000 रु. दंड
सार्वजनिक ठिकाणी कचरा जाळणे
5,000 रु. दंड
सार्वजनिक ठिकाणी थुंकणे
प्रत्येकी 1,000 रु. याप्रमाणे ३ कारवाई – एकूण 3,000 रु.
या मोहिमेत महापालिकेचे क्षेत्रीय अधिकारी किशोर ननवरे व सहायक आरोग्य अधिकारी कुंडलिक दरवडे यांच्या मार्गदर्शनाखाली आरोग्य निरीक्षक व कर्मचारी दलाने संयुक्तरीत्या ही कारवाई केली. आरोग्य निरीक्षक गणेश राजगे, आरोग्य मुकादम आबा कदम, अरुण राऊत, प्रदीप जगताप, किरण त्रिभुवन, गणेश कार्ले, विशाल यादव, धोंडीबा भालेराव, सागर जाधव, पांडुरंग साठे, अमरदीप जगताप, श्रीकांत कांबळे, संतोष शेरखाने, भारत गायकवाड तसेच डिवाईन स्टाफ यश लोंढे यांचा या मोहिमेत समावेश होता.
