Times Of Maharashtra Desk : रायगड जिल्ह्यातील पोलादपूर येथे झालेल्या प्रचार सभेत शिवसेनेचे मंत्री भरत गोगावले यांनी भाजप नेते प्रवीण दरेकर यांच्यावर जोरदार टीका केली. ज्यांच्यासाठी आम्ही उठाव करून एकत्र आलो, त्यांनी थोडी तरी जाणीव ठेवली पाहिजे असा विचार गोगावले यांनी मांडला
तुम्ही कधी अमावास्येला, कधी पौर्णिमेला गावाकडे येता आणि काहीतरी सांगून जाता. पण हे नेते मुंबईत शोधायचे कुठे? असा सवालही त्यांनी उपस्थित केला. आमच्यासाठी कुणी, किती काम केलं आहे, हे आम्हाला चांगलं माहिती आहे. असे सांगत त्यांनी भाजपवर अप्रत्यक्ष टीका केली. यामुळे रायगडमध्ये भाजप आणि शिवसेना यांच्यातील संघर्ष अधिक तीव्र झाल्याचे चित्र दिसून येत आहे.
ही आमची चूकच
गोगावले यांनी लोकसभा निवडणुकीत राष्ट्रवादीला मतदान करणे ही चूक ठरल्याचे जाहीरपणे मान्य केले. लोकसभेला राष्ट्रवादीला मतदान करून आम्ही पाप केलं असेही ते विचार त्यांनी प्रचार सभेत मांडले.
यंदाच्या जिल्हा परिषद आणि पंचायत समिती निवडणुकांमध्ये शिवसेना एकटी लढत असून, यापुढे राष्ट्रवादीसोबत कोणतीही युती होणार नाही, असे त्यांनी ठणकावून सांगितले. यापुढे राष्ट्रवादीसोबत जाणार नाही असे स्पष्ट मत त्यांनी व्यक्त केले.
रायगडमध्ये राष्ट्रवादीला मोठा धक्का; शिवसेनेत जाहीर प्रवेश
जिल्हा परिषद व पंचायत समिती निवडणुकांच्या पार्श्वभूमीवर रायगड जिल्ह्यात शिवसेनेने राष्ट्रवादीला मोठा धक्का दिला आहे. माणगाव तालुक्यातील गोरेगाव जिल्हा परिषद मतदारसंघात राष्ट्रवादीच्या माजी पंचायत समिती सभापती शकुंतला टेंबे तसेच माजी विभाग अध्यक्ष व ज्येष्ठ नेते राम टेंबे यांनी राष्ट्रवादीची साथ सोडत मंत्री भरत गोगावले यांच्या उपस्थितीत शिवसेनेत जाहीर प्रवेश केला. या पक्षप्रवेशामुळे या मतदारसंघात शिवसेनेची ताकद लक्षणीयरीत्या वाढल्याचे चित्र आहे.
रायगडमध्ये शिवसेनेचा पहिला बिनविरोध विजय
रायगड जिल्ह्यातील महाड तालुक्यात शिंदे गटाच्या शिवसेनेला पहिला बिनविरोध विजय मिळाला आहे. महाड पंचायत समितीतील सवाने-धामणे गणातून शिवसेनेचे उमेदवार अनिल जाधव यांच्या विरोधातील सर्व उमेदवारांनी शेवटच्या दिवशी माघार घेतल्याने अनिल जाधव हे बिनविरोध निवडून आले. या यशानंतर शिवसेनेत जल्लोषाचे वातावरण पाहायला मिळाले. मंत्री भरत गोगावले यांचे सुपुत्र विकास गोगावले यांनी शिवसैनिकांना पेढे भरवत आनंद साजरा केला.
