Times of Maharashtra Desk: डबल महाराष्ट्र केसरी पैलवान चंद्रहार पाटील यांनी सांगली जिल्ह्यातील बोरगाव येथे आयोजित केलेल्या राज्यातील सर्वात मोठ्या श्रीनाथ केसरी बैलगाडा शर्यत आणि शिवसेना बैलगाडा शर्यत अधिवेशनाने संपूर्ण महाराष्ट्राचे लक्ष वेधून घेतले. हजारो बैलगाडा प्रेमींच्या उपस्थितीत पार पडलेल्या या थरारक स्पर्धेत, ‘हेलिकॉप्टर बैज्या आणि ब्रेक फेल’ या बैलजोडीने मैदान मारत मानाची फॉर्च्युनर कार जिंकली.
विजेती बैलजोडी आणि बक्षिसांची लयलूट
कोल्हापूरच्या शिरोळ येथील बाळू दादा हजारे यांचा ‘हेलिकॉप्टर बैज्या’ आणि सांगलीच्या भिलवडी येथील पाटील डेअरीचा ‘ब्रेक फेल’ या बैलजोडीने ‘श्रीनाथ केसरी’ चा बहुमान पटकावला. या जोडीला फॉर्च्युनर कार मिळाली. तर दुसरी फॉर्च्युनर कार ‘लखन’ आणि ‘सर्जा’ या बैलजोडीने जिंकली. या विक्रमी शर्यतीमध्ये दोन फॉर्च्युनर, दोन थार, सात ट्रॅक्टर आणि दीडशे टू-व्हीलर अशा कोट्यवधी रुपयांच्या बक्षिसांची लयलूट करण्यात आली. तसेच, महिलांसाठी स्वतंत्र शर्यतीचे आयोजन करण्यात आले आणि शंभर महिलांना गोवंश संवर्धनासाठी गायी देण्यात आल्या.
पुढील वर्षी विजेत्याला थेट BMW!
शर्यत संपताच आयोजक चंद्रहार पाटील यांनी पुढील वर्षीच्या स्पर्धेसाठी सर्वात मोठी घोषणा केली आहे. बैलगाडा शर्यतीच्या इतिहासात पहिल्यांदाच पुढील शर्यतीसाठी प्रथम बक्षीस म्हणून थेट BMW कार देण्यात येणार असल्याचे त्यांनी जाहीर केले. विजेत्यांचा बक्षीस वितरण सोहळा मुंबई मंत्रालयासमोर होणार आहे.
उपमुख्यमंत्री एकनाथ शिंदे यांची उपस्थिती
या शर्यतीसाठी राज्याचे उपमुख्यमंत्री एकनाथ शिंदे यांच्यासह मंत्री उदय सामंत, माजी आमदार शहाजीबापू पाटील उपस्थित होते. ग्र उपमुख्यमंत्री शिंदे यांनी बैलगाडा शर्यतींमुळे महाराष्ट्राच्या ग्रामीण अर्थव्यवस्थेला नवे बळ मिळाल्याचे सांगितले. एकेकाळी पन्नास हजार रुपयांचा बैल आज तीन कोटींपर्यंत विकला जातो, तर शर्यतींची उलाढाल शंभर कोटींच्या घरात पोहोचली असून लवकरच ती ५०० ते एक हजार कोटींपर्यंत जाईल, असा विश्वास त्यांनी व्यक्त केला. तसेच, सरकार या परंपरेचे जतन करून त्यास आंतरराष्ट्रीय स्तरावर नेण्याचे उद्दिष्ट ठेवत असल्याचेही त्यांनी स्पष्ट केले.
