Times of Maharashtra : कोंढवा परिसरातील राजकारणात मोठी खळबळ उडाली असून राष्ट्रवादी काँग्रेस (अजित पवार गट) कडून निवडणूक लढवत असलेल्या उमेदवारांनी थेट उपमुख्यमंत्री अजित पवार यांचा फोटो हटवून खासदार सुप्रिया सुळे यांचा फोटो लावल्याचे समोर आले आहे. या प्रकारामुळे राजकीय वर्तुळात चर्चांना उधाण आले आहे.
कोंढवा-कौसरबाग प्रभाग क्रमांक १९ मधील संबंधित उमेदवार हे अधिकृतपणे अजित पवार गटाकडून निवडणूक लढवत असले, तरी प्रत्यक्षात ते शरद पवार गटाच्या “तुतारी” या चिन्हावर प्रचार करत असल्याचे चित्र दिसून येत आहे. गेल्या काही दिवसांपासून उमेदवारांविरोधात स्थानिक पातळीवर वाढता असंतोष, टीका आणि जनतेचा विरोध पाहता हा निर्णय घेतल्याची चर्चा आहे.
“अजित दादा, अजित दादा” म्हणत प्रचार करणारे उमेदवार आता थेट सुप्रिया सुळे यांचा फोटो लावत असल्याने,
“चाचा ही भतीजा है, और भतीजा ही चाचा आहे” अशा राजकीय उपरोधिक चर्चांना कोंढव्यात उधाण आले आहे.
फोटो हटवण्यामागचे नेमके कारण अद्याप अस्पष्ट
अजित पवार यांचा फोटो हटवण्यामागील अधिकृत कारण अद्याप स्पष्ट झालेले नसले, तरी स्थानिक मतदारांचा वाढता विरोध आणि बदलता राजकीय कौल हे प्रमुख कारण असल्याचे बोलले जात आहे. विशेषतः अजित पवार गटाने भाजपसोबत केलेल्या युतीमुळे कोंढवा परिसरातील अल्पसंख्याक मतदारांमध्ये नाराजी असल्याची चर्चा आहे.
“तुतारी” चिन्हाबाबत मतदारांमध्ये संभ्रम
अजित पवार गट आणि शरद पवार गट यांच्यातील राजकीय समीकरणांमुळे मतदारांमध्ये संभ्रमाचे वातावरण निर्माण झाले आहे. नागरिकांमध्ये असा सूर आहे की, या उमेदवारांना दिले जाणारे मत अप्रत्यक्षपणे सत्ताधारी भाजपलाच बळकटी देणार का, असा प्रश्न उपस्थित होत आहे.
या पार्श्वभूमीवर कोंढवा मतदारसंघातील राजकीय घडामोडींकडे संपूर्ण पुण्याचे लक्ष लागले असून, आगामी निवडणुकीत मतदारांचा कौल नेमका कुणाच्या बाजूने जाणार, याबाबत उत्सुकता वाढली आहे.
