दौंड (प्रतिनिधी-संघराज गायकवाड,राहुल आढाव) : दौंड शहरातील गोपाळवाडी रोडवरील महालक्ष्मी मल्टिस्पेशालिटी हॉस्पिटलसमोरील रस्त्यावर सध्या गंभीर वाहतूक समस्या निर्माण झाली आहे. हॉस्पिटलला स्वतंत्र पार्किंग व्यवस्था उपलब्ध असतानाही, हॉस्पिटलचीच ॲम्बुलन्स तसेच रुग्ण व नातेवाईकांची वाहने थेट सार्वजनिक रस्त्यावर उभी केली जात आहेत.
बेशिस्त पार्किंग:सर्वाना त्रास
या बेशिस्त पार्किंगमुळे रस्ता अरुंद झाला असून दुचाकीस्वार, पादचारी व चारचाकी वाहनचालकांना मोठ्या अडचणींचा सामना करावा लागत आहे.
विशेष म्हणजे दररोज सायंकाळी पाच वाजल्यानंतर शाळां सुटतात त्याच वेळेस परिसरातील कंपन्यांच्या गाड्यांचीही ये-जा याच रस्त्यावरून सुरू असते. त्यामुळे एकाच वेळी विद्यार्थी, पालक, कर्मचारी, रुग्ण व सामान्य नागरिकांची मोठी गर्दी होत असून वाहतूक पूर्णपणे विस्कळीत होते. पादचाऱ्यांना रस्त्यावरून चालणेही कठीण झाले आहे.
उपचारांपेक्षा दक्षता बरी
या परिस्थितीमुळे येथे कोणत्याही क्षणी मोठा अपघात होण्याची दाट शक्यता निर्माण झाली असून, प्रशासनाने वेळीच हस्तक्षेप न केल्यास गंभीर घटना घडण्याची शक्यता नाकारता येत नाही.
महालक्ष्मी हॉस्पिटल प्रशासनाने तातडीने स्वतःची पार्किंग व्यवस्था वापरात आणावी आणि रस्त्यावर होणारे बेशिस्त पार्किंग थांबवावे, अशी जोरदार मागणी गोपाळवाडी परिसरातील नागरिकांकडून करण्यात येत आहे.
