ब्रह्मपुरी (प्रतिनिधी रुपेश देशमुख) : स्वतःचा स्वार्थ साधण्यासाठी शेजाऱ्यांच्या हक्काच्या पाण्यावर डल्ला मारणाऱ्या पाणी चोरांना ब्रह्मपुरी नगरपरिषदेने जोरदार झटका दिला आहे. उन्हाळ्याच्या तीव्र झळांमुळे आधीच नागरिक होरपळत असताना, स्वतःच्या नळाला बेकायदेशीरपणे टिल्लू पंप लावून पाणी खेचणाऱ्या प्रवृत्तींमुळे शहरात कृत्रिम टंचाई निर्माण झाली होती. या गंभीर प्रकाराची दखल घेत नगरपरिषदेच्या मुख्याधिकारी डॉ. माधुरी सलामे यांच्या थेट मार्गदर्शनाखाली पालिकेच्या पथकाने १६ मे रोजी सकाळीच भवानी वॉर्ड आणि बालाजी वॉर्डात धडक मोहीम राबवून तब्बल १४ ‘टिल्लू पंप’ (पाणी उपशाच्या मोटारी) जप्त केले. या यशस्वी आणि धडक कारवाईमुळे सार्वजनिक पाणीपुरवठ्यावर दरोडा टाकणाऱ्या बेजबाबदार ग्राहकांचे धाबे दणाणले आहेत.
मे महिन्याच्या कडक उन्हामुळे ब्रह्मपुरी शहरात पिण्याच्या पाण्याची मागणी मोठ्या प्रमाणात वाढली आहे. अशा परिस्थितीत सर्व नागरिकांना समान पाणी मिळणे गरजेचे असताना, काही नागरिकांनी स्वतःच्या सोयीसाठी नळाला थेट मोटर पंप जोडले होते. स्वतःची टाकी भरण्यासाठी हे लोक तासनतास मोटारी चालू ठेवून पाणी खेचत होते. या बेकायदेशीर कृत्यामुळे जलवाहिन्यांमधील पाण्याचा दाब पूर्णपणे कमी झाला आणि शेवटच्या टोकावरील प्रामाणिक ग्राहकांना थेंब-थेंब पाण्यासाठी वणवण करावी लागत होती. नागरिकांमधील वाढता असंतोष आणि तक्रारींची गंभीर दखल घेत मुख्याधिकारी डॉ. माधुरी सलामे यांनी तात्काळ विशेष पथक तयार करून या पाणी चोरांवर कडक कारवाईचे आदेश दिले.
मुख्याधिकाऱ्यांच्या आदेशानुसार पाणीपुरवठा विभागाने सकाळीच दोन्ही वॉर्डांमध्ये अचानक शोधमोहीम सुरू केली. पालिकेच्या विशेष पथकाने भवानी वॉर्ड आणि बालाजी वॉर्डातील संशयित घरांमध्ये थेट जाऊन नळ जोडण्यांची प्रत्यक्ष पाहणी केली. यावेळी अनेक ठिकाणी मुख्य जलवाहिनीवरून येणाऱ्या नळाला थेट टिल्लू पंप लावून पाणी खेचले जात असल्याचे रंगेहात आढळून आले.
पंप पालिकेच्या गोदामात जमा करण्यात आले असून संबंधित घरमालकांवर दंडात्मक कारवाईची प्रक्रिया सुरू करण्यात आली आहे.
“सार्वजनिक पाणीपुरवठा यंत्रणेवर सर्व नागरिकांचा समान हक्क आहे. मे महिन्याच्या तीव्र उन्हात शहरातील शेवटच्या नागरिकालाही पुरेसे आणि समान पाणी मिळावे, हाच या धडक मोहिमेचा मुख्य उद्देश आहे. काही नागरिकांच्या स्वार्थी प्रवृत्तीमुळे संपूर्ण वॉर्डाला ओलीस ठेवले जाऊ शकत नाही. भवानी आणि बालाजी वॉर्डात करण्यात आलेली कारवाई ही केवळ सुरुवात आहे; शहरातील इतर संवेदनशील भागांतही अशीच आकस्मिक तपासणी सत्र सुरू राहील. यापुढेही कोणी बेकायदेशीरपणे टिल्लू पंप वापरताना आढळल्यास, त्यांचा पंप जप्त करून नळ जोडणी कायमची खंडित केली जाईल आणि संबंधितांवर थेट फौजदारी गुन्हे दाखल केले जातील. नागरिकांनी पाण्याचा अपव्यय टाळावा आणि पालिकेला सहकार्य करावे.”
डॉ. माधुरी सलामे मुख्याधिकारी, नगरपरिषद ब्रह्मपुरी
