Times of Maharashtra Desk : मोहोळ नगरपरिषदेच्या 2025 च्या निवडणुकीत इतिहास रचला गेला आहे. महाविद्यालयीन शिक्षण घेत असलेली केवळ 22 वर्षीय सिद्धी वस्त्रे हिने नगराध्यक्षपदाची माळ गळ्यात घालून संपूर्ण महाराष्ट्राचे लक्ष वेधले आहे. सामान्य कुटुंबातून आलेल्या सिद्धी वस्त्रे यांनी फक्त एका महिन्यापूर्वी उमेदवारी अर्ज दाखल केला होता आणि थोड्या कालावधीत प्रभावी प्रचार करून निर्णायक विजय मिळवला.
सिद्धी वस्त्रे सध्या सीएच्या कार्यालयात कार्यरत असून, अल्प कालावधीत मतदारांपर्यंत पोहोचून शहरातील नागरिकांच्या मूलभूत प्रश्नांवर थेट भूमिका घेतली. तसेच तरुणांशी साधलेला संवाद आणि साधी, स्वच्छ प्रतिमा यामुळे मतदारांनी त्यांना मोठ्या प्रमाणात पाठिंबा दिला. त्यांनी भाजपच्या बलाढ्य उमेदवार शीतल क्षीरसागर यांचा 170 मतांनी पराभव करत नगराध्यक्षपद पटकावले. या विजयामुळे मोहोळच्या राजकारणात तरुण नेतृत्वाचा नवा अध्याय सुरू झाल्याची चर्चा रंगली आहे.
सोलापूर जिल्ह्यातील निवडणूक निकालांची वैशिष्ट्ये
सोलापूर जिल्ह्यातील 12 नगरपरिषद व नगरपंचायतींचे निकाल जाहीर झाले असून, या निकालांनी जिल्ह्यातील राजकीय समीकरणे बदलली आहेत. यंदा भाजपने सर्व 12 ठिकाणी नगराध्यक्षपदासाठी उमेदवार लढवले, मात्र फक्त 4 ठिकाणी यश मिळवले. मित्रपक्ष शिवसेना (शिंदे गट) यांनी 6 ठिकाणी लढत 3 ठिकाणी विजय मिळवला, तर काँग्रेसला जिल्ह्यात एकही नगराध्यक्षपद जिंकता आले नाही. विशेषतः मोहोळसह काही प्रमुख ठिकाणी तरुण आणि नवउमेदवारांचा यश, आगामी जिल्हा परिषद व महापालिका निवडणुकांच्या पार्श्वभूमीवर सोलापूर राजकारण अधिक चुरशीचे होणार असल्याचे संकेत देत आहेत.
