जळगाव (प्रतिनिधी – विनोद पवार):
Times of Maharashtra Desk, Jalgaon : महापालिका निवडणुकीच्या पार्श्वभूमीवर जळगाव शहरात आदर्श आचारसंहितेअंतर्गत नेमण्यात आलेल्या स्थिर निरीक्षण व भरारी पथकाने मोठी कारवाई केली आहे. ममुराबाद रस्त्यावर नियमित तपासणीदरम्यान संशयास्पद कार थांबवून झडती घेतली असता, कारमधून मोठ्या प्रमाणात रोख रक्कम तसेच सोन्या-चांदीचा मुद्देमाल आढळून आला.
या कारवाईत सुमारे २९ लाख रुपये रोख, ८० ग्रॅम सोनं आणि ३ किलो चांदी जप्त करण्यात आली. संबंधित मुद्देमाल हा बढाणपूर (मध्यप्रदेश) येथून जळगावातील सराफा व्यावसायिकांकडे नेला जात असल्याचे कारमधील व्यक्तींनी सांगितले. मात्र, या व्यवहाराबाबत कोणतीही वैध पावती, बिल अथवा अधिकृत कागदपत्रे सादर न झाल्याने पथकाचा संशय बळावला.
कारमध्ये बढाणपूर येथील राकेश दामोदरदास श्रॉफ, जयेश राकेश श्रॉफ तसेच चालक नवीन भास्कर हे तिघे प्रवास करत असल्याची माहिती समोर आली आहे. चौकशीत जप्त मुद्देमाल हा बढाणपूर येथील सुवर्ण व्यावसायिक दामोदरदास गोपालदास श्रॉफ यांच्या मालकीचा असल्याचे स्पष्ट झाले आहे.
सदर प्रकरणाचा पुढील तपासासाठी संबंधित कारवाई पोलिस विभाग व निवडणूक प्रशासनाकडे वर्ग करण्यात आली आहे.
