जळगाव | प्रतिनिधी : विनोद पवार
Times of Maharashtra : शहरात वाढत्या गुन्हेगारी घटनांच्या पार्श्वभूमीवर पिंप्राळा परिसरात गोळीबाराची धक्कादायक घटना घडली आहे. पिंप्राळा येथील आनंद मंगल सोसायटीजवळ असलेल्या हनुमान मंदिराजवळ मिस्त्री कामाच्या ठेकीच्या पैशांच्या वादातून युवकावर गोळीबार करण्यात आल्याची घटना गुरुवारी मतदानाच्या दिवशी घडली. सुदैवाने या घटनेत कोणालाही इजा झाली नाही.
प्राथमिक माहितीनुसार, संशयित आरोपी तुषार सोनवणे याच्याकडून मस्तफा नावाच्या युवकाचे सुमारे १ लाख ७० हजार रुपये मिस्त्री कामाचे थकित होते. या पैशांच्या मागणीवरून दोघांमध्ये मागील काही दिवसांपासून वाद सुरू होता. गुरुवारी आनंद मंगल सोसायटीतील हनुमान मंदिराजवळ दोघे समोरासमोर आले असता पुन्हा पैशांवरून जोरदार वाद झाला. वादाचे रूपांतर हाणामारीत होत असतानाच संतप्त तुषार सोनवणे याने मस्तफावर गोळीबार केल्याची माहिती आहे.
घटनेची माहिती मिळताच पोलिसांनी तात्काळ घटनास्थळी धाव घेतली. परिसरात तणावाचे वातावरण निर्माण झाले असून नागरिकांमध्ये भीतीचे वातावरण पसरले आहे. पोलिसांनी घटनास्थळाची पाहणी करून आरोपीच्या शोधासाठी पथके रवाना केली असून पुढील तपास सुरू आहे.
