जळगाव (प्रतिनिधी विनोद पवार) : जळगाव जिल्ह्याचे आदरणीय जिल्हाधिकारी श्री. रोहन घुगे (IAS) यांच्या हस्ते जळगाव जिल्हाधिकारी कार्यालयात यूपीएससी २०२५ परीक्षेत उल्लेखनीय यश संपादन केलेल्या कु. शिवम सीमा राजेंद्र वखरे (डोंबिवली निवासी, मूळगाव – बेटावद बुद्रुक, ता. जामनेर, जि. जळगाव) यांचा सन्मानपूर्वक सत्कार करण्यात आला.
या प्रसंगी कु. वखरे यांना शाल व श्रीफळ देऊन गौरविण्यात आले. जिल्हाधिकारी श्री. घुगे यांनी त्यांच्या यशाचे तोंडभरून कौतुक करत सांगितले की, “यूपीएससी सारख्या कठीण स्पर्धा परीक्षेत यश मिळवणे हे मोठ्या जिद्दीचे आणि सातत्यपूर्ण परिश्रमाचे फलित आहे.” त्यांनी शिवम यांच्या मेहनत, चिकाटी आणि ध्येयवेड्या वृत्तीचे विशेष कौतुक केले.
तसेच त्यांनी पुढे सांगितले की, ग्रामीण भागातून येणाऱ्या विद्यार्थ्यांसाठी शिवम वखरे यांचे यश हे प्रेरणादायी असून अशा यशस्वी विद्यार्थ्यांनी समाजासाठी कार्य करत इतरांना मार्गदर्शन करावे. त्यांच्या उज्ज्वल भविष्यासाठी त्यांनी मनःपूर्वक शुभेच्छा दिल्या.
या अभिमानास्पद क्षणी शिवम यांचे वडील, ज्येष्ठ पत्रकार श्री. राजेंद्र वखरे उपस्थित होते. त्यांनी आपल्या मुलीच्या यशाबद्दल आनंद व्यक्त करत तिच्या मेहनतीचे कौतुक केले.
हा सन्मान सोहळा वखरे कुटुंबासाठी अत्यंत आनंददायी, अभिमानास्पद आणि प्रेरणादायी ठरला असून परिसरातही या यशाबद्दल आनंदाचे वातावरण आहे.
