Times Of Maharshtra Desk : न्यायालयाच्या स्पष्ट आदेशानंतर अहेरी नगरपंचायत प्रशासनाने मोठी कारवाई करत माजी जिल्हा परिषद अध्यक्ष तथा काँग्रेस नेते अजय कंकडालवार यांच्या अहेरी येथील चार मजली व्यावसायिक इमारतीवर थेट बुलडोझर चालवला. राष्ट्रीय महामार्गालगत उभारण्यात आलेली ही इमारत नगरपंचायतीची अधिकृत परवानगी न घेता बांधण्यात आल्याचा ठपका ठेवण्यात आला होता.
नगरपंचायतीकडून यापूर्वी अनेक वेळा अजय कंकडालवार यांना नोटीस बजावण्यात आली होती. मात्र, त्याकडे दुर्लक्ष केल्याने प्रकरण न्यायालयात गेले. अहेरी न्यायालयाने दोन वेळा सदर इमारत पाडण्याचे आदेश दिले होते. या आदेशाविरोधात अजय कंकडालवार यांनी अतिरिक्त जिल्हा सत्र न्यायालयात दाद मागितली होती. मात्र, तेथे तात्पुरती स्थगिती देण्यात आली असली तरी उच्च न्यायालयात जाण्याची संधी असूनही त्यांनी पुढील अपील दाखल केले नाही, अशी माहिती समोर आली आहे.
दरम्यान, अहेरी न्यायालयाच्या अंतिम निर्णयानुसार आज नगरपंचायत प्रशासनाने प्रत्यक्ष कारवाई सुरू केली. इमारत पाडण्याच्या कामादरम्यान कुठलाही अनुचित प्रकार घडू नये यासाठी मोठा पोलीस बंदोबस्त तैनात करण्यात आला होता. जेसीबी व बुलडोझरच्या साहाय्याने इमारतीचे पाडकाम सुरू असताना परिसरात नागरिकांची मोठी गर्दी पाहायला मिळाली.
या कारवाईमुळे गडचिरोली जिल्ह्याच्या राजकीय वर्तुळात खळबळ उडाली आहे. अजय कंकडालवार हे काँग्रेस पक्षाचे प्रभावी नेते असून त्यांनी गडचिरोली जिल्हा परिषद अध्यक्षपद भूषवले आहे. त्यामुळे ही कारवाई राजकीय हेतूपुरस्कृत तर नाही ना? असा सवाल उपस्थित केला जात असून विविध चर्चांना उधाण आले आहे.
एकीकडे प्रशासनाने न्यायालयाच्या आदेशाची अंमलबजावणी केल्याचे सांगितले असले, तरी दुसरीकडे या कारवाईच्या वेळेवर आणि पद्धतीवरून राजकीय आरोप-प्रत्यारोप सुरू झाले आहेत.
