Times of Maharashtra Desk, Pune : आगामी पुणे महानगरपालिका निवडणुकीच्या पार्श्वभूमीवर नागरिकांमध्ये मतदानाविषयी जागरूकता निर्माण करण्याच्या उद्देशाने ‘ऑल इंडिया मायनॉरिटी अलायन्स लीडरशिप फोरम (AIMALF)’ या संस्थेने पुणे महानगरपालिकेचे आयुक्त नवल किशोर राम यांची भेट घेऊन निवेदन दिले. या निवेदनाद्वारे संस्थेने प्रशासनाला निवडणूक प्रक्रियेत स्वयंसेवी स्वरूपात सहकार्य करण्याची तयारी दर्शवली असून, नागरिकांचा मतदान प्रक्रियेतील सहभाग वाढविण्यासाठी विविध जनजागृती उपक्रम राबविण्याचा संस्थेचा मानस आहे.
संस्थेच्या प्रतिनिधी मंडळासोबतच्या भेटीदरम्यान आयुक्त नवल किशोर राम यांनी AIMALF च्या सामाजिक कार्याचे कौतुक केले. त्यांनी संस्थेच्या जनजागृती उपक्रमांचे स्वागत करत पुढील काळात संस्थेसोबत समन्वय साधून काम करण्याचे आश्वासन दिले.
यावेळी लोकशाही बळकट करण्यासाठी नागरिकांचा सक्रिय सहभाग आवश्यक आहे. मतदान करा – जबाबदार नागरिक बना या संकल्पनेखाली AIMALF तर्फे सोशल मीडियाद्वारे तसेच स्थानिक पातळीवर जनजागृती मोहीम व अन्य मोहीम राबविण्यात येईल. असे संस्थेचे सचिव मुज्जम्मील शेख यांनी सांगितले.
संस्थेचा मुख्य उद्देश नागरिकांना लोकशाही प्रक्रियेत सहभागी करून घेऊन पुणे शहरात जास्तीत जास्त मतदानाची टक्केवारी साध्य करणे आणि लोकशाही मूल्ये अधिक दृढ करणे हा असल्याचे देखील मंडळाने स्पष्ट केले.
AIMALF च्या या प्रतिनिधी मंडळामध्ये नजीर काजी, मुज्जम्मील शेख, मोहम्मद पाशा, फैसल रिश्तेवाला, फय्याज राज, आरिफ पठाण, सकलेन शेख, हैदर शेख व आदी उपस्थित होते.
AIMALF initiative for Pune Municipal Corporation elections
