देऊळगाव राजा, दि. ५ जून : जागतिक पर्यावरण दिनाचे औचित्य साधत बस स्टँड चौकातील महावीर स्तंभ परिसरात वटवृक्षाची लागवड करण्यात आली. सेवानिवृत्त आरएफओ जगन्नाथ डोईफोडे यांनी आपल्या आई-वडिलांच्या स्मृतिप्रीत्यर्थ हा उपक्रम राबविला.
महावीर स्तंभाजवळ नगरपालिकेने फायबरचा वटवृक्ष उभारला असला तरी, भविष्यात पर्यावरण संवर्धनासाठी आणि नागरिकांना सावलीचा लाभ मिळावा या उद्देशाने प्रत्यक्ष वटवृक्ष लावण्याची संकल्पना डोईफोडे यांनी मांडली होती. या संकल्पनेला सामाजिक वनीकरण विभागाने सकारात्मक प्रतिसाद दिला.
वनपाल श्री. कायंदे, वनरक्षक श्री. वायाळ तसेच विभागातील इतर कर्मचाऱ्यांच्या सहकार्याने पर्यावरण दिनी वटवृक्षाची लागवड करण्यात आली. लावण्यात आलेल्या वृक्षाचे संगोपन व संरक्षण करण्याची संपूर्ण जबाबदारीही जगन्नाथ डोईफोडे यांनी स्वीकारली आहे.
वटवृक्ष हा दीर्घायुषी, पर्यावरणपूरक आणि जैवविविधतेला पोषक मानला जातो. त्यामुळे या उपक्रमाचे सर्व स्तरांतून कौतुक होत आहे. वृक्षारोपण कार्यक्रमाला वनपाल श्री. कायंदे, वनरक्षक श्री. वायाळ, लिपिक श्री. सोसे, शेख सलाउद्दीन यांच्यासह अनेक मान्यवर उपस्थित होते.
पर्यावरण संवर्धनाचा संदेश देणारा हा उपक्रम नागरिकांसाठी प्रेरणादायी ठरत आहे.
