गणेश नारंग, (पिंपरी-चिंचवड प्रतिनिधी)
Times of Maharashtra Desk, Pune: आगामी पिंपरी-चिंचवड महापालिका निवडणुकांच्या पार्श्वभूमीवर वाकड परिसरात भाजपमधील अंतर्गत नाराजी उघडपणे समोर आली आहे. स्थानिक नेते व माजी नगरसेवक राहुल कलाटे यांच्या भाजपमधील संभाव्य पक्षप्रवेशामुळे वाकडमधील भाजप पदाधिकारी आणि कार्यकर्त्यांमध्ये तीव्र असंतोष पसरला असून, या निर्णयाला कडाडून विरोध करण्यात येत आहे.
या मुद्द्यावर वाकड येथे आयोजित पत्रकार परिषदेत माजी नगरसेवक विनायक गायकवाड, भाजप शहर उपाध्यक्ष विशाल कलाटे व राम वाकडकर, ओबीसी मोर्चाचे शहराध्यक्ष चेतन भुजबळ, महिला मोर्चाच्या प्रदेश पदाधिकारी भारती विनोदे यांच्यासह अनेक स्थानिक पदाधिकारी मोठ्या संख्येने उपस्थित होते. यावेळी सर्वांनी एकत्र येत पक्षाच्या वरिष्ठ नेतृत्वाकडे आपली ठाम भूमिका मांडली.
पदाधिकाऱ्यांनी सांगितले की, दीर्घकाळ पक्षासाठी काम करणाऱ्या निष्ठावंत कार्यकर्त्यांना डावलून वारंवार पक्ष बदलणाऱ्या नेत्यांना प्राधान्य देणे हे पक्षाच्या विचारधारेविरोधात आहे. अशा निर्णयांमुळे भाजपची स्वच्छ प्रतिमा, संघटनात्मक शिस्त आणि कार्यकर्त्यांचा आत्मविश्वास डळमळीत होऊ शकतो, असा इशारा त्यांनी दिला.
राहुल कलाटे यांच्या राजकीय वाटचालीकडे लक्ष वेधताना, त्यांच्या बदलत्या भूमिकांमुळे जनतेत संभ्रम निर्माण झाल्याचे पदाधिकाऱ्यांनी नमूद केले. मागील निवडणुकांतील अपयश आणि वादग्रस्त घटनांचा उल्लेख करत, अशा पार्श्वभूमीच्या नेत्यामुळे भाजपच्या विश्वासार्हतेवर परिणाम होऊ शकतो, असे मत व्यक्त करण्यात आले.
यावेळी बोलताना भाजप शहर उपाध्यक्ष राम वाकडकर म्हणाले,
“वाकडमधील कार्यकर्त्यांची भावना अत्यंत स्पष्ट आहे. या प्रवेशामुळे पक्षातील एकजूट धोक्यात येऊ शकते. स्थानिक नेतृत्वाच्या मताकडे दुर्लक्ष झाले, तर त्याचे गंभीर परिणाम निवडणुकीत दिसू शकतात.”
पदाधिकाऱ्यांनी भाजपच्या वरिष्ठांना आवाहन केले की, निर्णय घेताना स्थानिक संघटनेचा आवाज ऐकावा. कार्यकर्त्यांचा विश्वास कायम राखला, तरच भाजपची ताकद वाढेल आणि आगामी महापालिका निवडणुकीत पक्षाला भक्कम यश मिळेल, असा विश्वासही यावेळी व्यक्त करण्यात आला.
