गणेश नारंग, (पिंपरी-चिंचवड प्रतिनिधी)
Times of Maharashtra Desk, Pune: पिंपरी-चिंचवडच्या राजकारणात आज एक मोठी आणि लक्षवेधी घडामोड समोर आली आहे. शिवसेना (उद्धव बाळासाहेब ठाकरे) पक्षाचे पिंपरी-चिंचवड शहराध्यक्ष संजोग वाघेरे पाटील यांनी आपल्या पदाचा राजीनामा देत पक्षाला ‘जय महाराष्ट्र’ केला आहे.
गेल्या अनेक दिवसांपासून संजोग वाघेरे पाटील हे भाजपाच्या वाटेवर असल्याच्या चर्चा राजकीय वर्तुळात सुरू होत्या. त्या चर्चांना आज अधिकृत दुजोरा मिळाला असून, त्यांनी शहराध्यक्ष पदाचा राजीनामा दिला आहे. त्यामुळे त्यांचा भारतीय जनता पक्षातील प्रवेश जवळपास निश्चित मानला जात आहे.
संजोग वाघेरे पाटील यांच्या या निर्णयामुळे शिवसेना (उबाठा) पक्षाला पिंपरी-चिंचवडमध्ये मोठा धक्का बसला आहे. तर दुसरीकडे, त्यांच्या संभाव्य पक्षप्रवेशामुळे भाजपाची संघटनात्मक ताकद आणि स्थानिक पातळीवरील प्रभाव अधिक वाढणार असल्याचे राजकीय वर्तुळात बोलले जात आहे.
स्थानिक राजकारणात प्रभावशाली नेतृत्व म्हणून ओळख असलेल्या संजोग वाघेरे पाटील यांच्या या निर्णयामुळे येत्या काळात पिंपरी-चिंचवडमधील राजकीय समीकरणे बदलण्याची दाट शक्यता व्यक्त केली जात आहे.
