Times of Maharashtra Desk: राज्यभर बिनविरोध नगरसेवक निवडून आणण्याचा सपाटा लावणाऱ्या भारतीय जनता पक्षाने पुण्यातही खाते उघडले आहे. पुणे महापालिकेच्या प्रभाग क्रमांक 35 सनसिटी–माणिक बाग येथून भाजपच्या मंजुषा नागपुरे, तर प्रभाग 35 ड मधून श्रीकांत जगताप हे उमेदवार बिनविरोध निवडून आले आहेत. या यशानंतर भाजप कार्यकर्त्यांनी परिसरात जोरदार जल्लोष केला.
पुणे महापालिका निवडणुकीकडे राज्याचे लक्ष लागले असून यावेळी भाजप, दोन्ही राष्ट्रवादी काँग्रेस, एकनाथ शिंदे यांची शिवसेना तसेच काँग्रेस–ठाकरे गट अशी चौरंगी लढत होण्याची शक्यता आहे. कोणत्याही परिस्थितीत पुणे महापालिकेची सत्ता कायम ठेवण्यासाठी भाजपने कंबर कसली असून, अजित पवार गटही पुन्हा एकदा महापालिकेवर वर्चस्व मिळवण्याच्या प्रयत्नात आहे.
प्रभाग 35 मध्ये अर्ज माघारीमुळे बिनविरोध निवड
अर्ज माघारीच्या शेवटच्या दिवशी विरोधी उमेदवारांनी अर्ज मागे घेतल्याने प्रभाग क्रमांक 35 मधून मंजुषा नागपुरे बिनविरोध निवडून आल्या. या प्रभागात एकूण सहा अर्ज दाखल झाले होते. त्यापैकी दोन अर्ज छाननीत बाद झाले, तर उर्वरित तीन उमेदवारांनी अर्ज मागे घेतले. परिणामी, मंजुषा नागपुरे यांची बिनविरोध निवड निश्चित झाली. त्याचप्रमाणे, प्रभाग 35 ड (सर्वसाधारण जागा) येथे नितीन गायकवाड यांनी अर्ज मागे घेतल्यामुळे भाजपचे श्रीकांत जगताप बिनविरोध विजयी झाले. त्यामुळे निवडणुकीपूर्वीच भाजपने पुण्यात दोन जागांवर विजय मिळवला आहे.
पुण्यात राजकीय समीकरणे स्पष्ट
पुणे महापालिका निवडणुकीसाठी दोन्ही राष्ट्रवादी काँग्रेस पक्ष एकत्र निवडणूक लढवणार असल्यावर शिक्कामोर्तब झाले आहे. शरद पवार गटाची राष्ट्रवादी काँग्रेस पुण्यात 40 जागांवर ‘तुतारी’ चिन्हावर निवडणूक लढवणार आहे.
दुसरीकडे, भाजप आणि एकनाथ शिंदे यांची शिवसेना पुण्यात स्वबळावर निवडणूक लढवणार आहेत. शिंदे गटाची शिवसेना 123 जागांवर उमेदवार देणार असल्याची माहिती आहे. काँग्रेस आणि उद्धव ठाकरे गटाची शिवसेना एकत्र निवडणूक लढवणार असून, उद्धवसेना–मनसे युतीही झाली आहे. उद्धव ठाकरे गटाच्या वाट्याला आलेल्या काही जागा मनसेला देण्यात येणार आहेत. भाजप आणि शिंदे गटात युती न झाल्याने पुणे महापालिका निवडणुकीत चौरंगी लढत रंगणार असल्याचे चित्र स्पष्ट झाले आहे.
