Times of Maharashtra : इराणमध्ये प्रचंड महागाई आणि सर्वोच्च नेता अयातुल्लाह अली खामेनेई यांच्या विरोधात सुरू असलेली आंदोलने सलग सहाव्या दिवशीही सुरूच आहेत. ही आंदोलने आता इराणच्या पवित्र शहरांपर्यंत पोहोचली असून परिस्थिती अधिकच चिघळत चालली आहे.
कोम हे शिया धर्मगुरूंचे प्रमुख केंद्र मानले जाते. ईराण इंटरनॅशनलच्या वृत्तानुसार, कडेकोट सुरक्षा व्यवस्थेच्या पार्श्वभूमीवरही आंदोलकांनी राजेशाहीच्या समर्थनार्थ घोषणा दिल्या. दरम्यान, आंदोलक आणि सुरक्षा दलांमध्ये जोरदार हिंसक चकमक झाली.
इराणमध्ये या आंदोलनाची सुरुवात 28 डिसेंबर रोजी राजधानी तेहरानमध्ये व्यापाऱ्यांनी केली होती. त्यानंतर आता मोठ्या संख्येने GenZ तरुणही आंदोलनात सहभागी झाले असून देशभरात असंतोष वाढताना दिसत आहे.
ट्रम्प यांचा इशारा: आंदोलकांच्या मदतीसाठी अमेरिका सज्ज
अमेरिकेचे राष्ट्राध्यक्ष डोनाल्ड ट्रम्प यांनी शुक्रवारी इराणला थेट इशारा दिला. शांततामय आंदोलकांवर हल्ले झाले, तर अमेरिका कठोर पावले उचलण्यास मागेपुढे पाहणार नाही, असे त्यांनी स्पष्ट केले.
ट्रम्प यांनी आपल्या ‘ट्रुथ सोशल’ या सोशल मीडिया प्लॅटफॉर्मवर लिहिले,
“जर इराणने शांततामय आंदोलकांवर गोळीबार केला किंवा त्यांची निर्घृण हत्या केली, तर अमेरिका त्यांच्या मदतीसाठी पुढे येईल. आम्ही पूर्णपणे तयार आहोत.”
याआधीही अमेरिका इराणच्या लष्करी तळांवर आणि अणु-सुविधांवर हल्ले केलेले आहे. जून 2025 मध्ये इराण-इजराइलमध्ये 12 दिवसांचे युद्ध झाले होते, ज्यात अमेरिकेनेही सहभाग घेतला होता.
इराण आज आर्थिक संकट, प्रचंड महागाई, आंतरराष्ट्रीय निर्बंध, वाढती बेरोजगारी, चलनमूल्य घसरण आणि सतत सुरू असलेल्या जनआंदोलनांसारख्या गंभीर आव्हानांना सामोरे जात आहे.
