Times of Maharashtra Desk: नवीन वर्षाच्या सुरुवातीलाच सोने आणि चांदीच्या दरात पुन्हा एकदा जोरदार तेजी पाहायला मिळत आहे. मल्टी कमोडिटी एक्सचेंज (MCX) वर चांदीच्या दरात 7 हजार रुपयांहून अधिक वाढ झाली असून सोन्याचे दरही हजार रुपयांपेक्षा जास्त वाढले आहेत. MCX वर सकाळी 11.25 वाजता 5 मार्चच्या वायद्याचे चांदीचे दर 7,468 रुपयांनी वाढून 2,43,341 रुपये प्रति किलो इतके झाले. तर 5 फेब्रुवारीच्या वायद्याचे सोन्याचे दर 1,011 रुपयांनी वाढून 1,36,815 रुपये प्रति तोळा या पातळीवर पोहोचले आहेत.
2025 मध्ये सोने-चांदीत मोठी वाढ
कमोडिटी बाजारातील जाणकारांच्या मते, 2025 मध्ये चांदीच्या दरात तब्बल 150 टक्क्यांपर्यंत वाढ झाली असून, सोन्याच्या दरात सुमारे 70 टक्क्यांची वाढ नोंदवली गेली आहे. गुंतवणूकदारांमधील सतर्कता आणि जागतिक अनिश्चिततेमुळे सुरक्षित गुंतवणूक म्हणून सोने-चांदीकडे कल वाढल्याचे तज्ज्ञांचे म्हणणे आहे.
चांदीच्या दरात वाढ का होतेय?
चीनने 1 जानेवारी 2026 पासून चांदीच्या निर्यातीवर कडक निर्बंध लागू करण्याचा निर्णय घेतला आहे. आता सरकारी परवानगीशिवाय चांदीची निर्यात करता येणार नाही. तसेच कोणत्याही खासगी कंपनीला थेट चांदी निर्यात करण्यास मनाई करण्यात आली आहे.
जागतिक बाजारात चीनचा चांदीवर 60 ते 70 टक्के थेट किंवा अप्रत्यक्ष प्रभाव असल्याने, या निर्णयाचा परिणाम जागतिक स्तरावर चांदीच्या मागणीत वाढ होण्याच्या स्वरूपात दिसून येत आहे.
उच्चांकानंतर किंचित घसरण
सोन्याने अलीकडेच 1,40,465 रुपयांचा उच्चांक गाठला होता, त्यानंतर दर कमी होऊन सध्या 1,36,815 रुपये इतके आहेत. तर चांदीने 2,54,174 रुपयांचा उच्चांक गाठल्यानंतर सध्या दर 2,43,341 रुपये या पातळीवर आहेत.
सराफा बाजारातील आजचे दर
सराफा बाजारातही सोने-चांदीच्या दरात तेजी कायम आहे.चांदीचा दर 5,656 रुपयांनी वाढून 2,34,906 रुपये प्रति किलो झाला असून, GST सह दर 2,41,953 रुपये आहेत.
सोन्याचा GST सह दर 1,38,447 रुपये प्रति तोळा असून, GST शिवाय दर 1,34,415 रुपये आहे.
कॅरेटप्रमाणे सोन्याचे दर
23 कॅरेट : 1,33,877 रुपये (950 रुपयांची वाढ)
22 कॅरेट : 1,23,124 रुपये (874 रुपयांची वाढ)
18 कॅरेट : 1,00,811 रुपये (715 रुपयांची वाढ)
14 कॅरेट : 78,633 रुपये (558 रुपयांची वाढ)
