रुपेश देशमुख ( ब्रह्मपुरी प्रतिनिधी ) : शहरातील एका घरावर पोलिसांनी धाड टाकून अवैध देशी व विदेशी दारूसाठा जप्त करत मोठी कारवाई केली. या कारवाईत एकूण २ लाख ६ हजार ९६० रुपयांचा मुद्देमाल हस्तगत करण्यात आला असून, एका अल्पवयीनासह तिघांना ताब्यात घेण्यात आले आहे. मुख्य आरोपी मात्र फरार असल्याची माहिती पोलिसांनी दिली.
पोलिसांना मिळालेल्या गुप्त माहितीनुसार, आरोपी प्रफुल घरडे यांच्या घरात अवैध दारूसाठा ठेवून त्याची वाहतूक करण्याची तयारी सुरू होती. या माहितीच्या आधारे गुन्हे शोध पथकाने तत्काळ धाड टाकली. तपासादरम्यान घरातून मोठ्या प्रमाणात देशी व विदेशी दारू आढळून आली.
या कारवाईत ५६,९६० रुपयांचा दारूसाठा, ३० हजार रुपये किमतीचे तीन मोबाईल फोन तसेच १ लाख २० हजार रुपये किमतीच्या दारू वाहतुकीसाठी वापरल्या जाणाऱ्या दोन दुचाकी असा एकूण २.०६ लाखांचा मुद्देमाल जप्त करण्यात आला.
या प्रकरणी शेषराव गेडाम, रोहित गौतम आणि एका अल्पवयीन मुलास पोलिसांनी ताब्यात घेतले असून, प्रफुल घरडे हा आरोपी सध्या फरार आहे. त्याचा शोध सुरू असल्याचे पोलिसांनी सांगितले.
ही कारवाई पोलिस निरीक्षक प्रमोद बानबले यांच्या मार्गदर्शनाखाली सहायक पोलिस निरीक्षक मनोज खडसे यांच्या नेतृत्वात गुन्हे शोध पथकाने केली. पथकातील मुकेश गजबे, वशिष्ट रंगारी, प्रवीण भिवगडे, नीलेश तुमसरे, इर्शाद खान आणि स्वप्निल पळसपगार यांनी कारवाईत सहभाग घेतला.
