विनोद पवार ( जळगाव प्रतिनिधी ) : जिल्ह्यातील सूक्ष्म, लघु व मध्यम उद्योगांना (MSME) चालना देण्यासाठी सेंट्रल बँक ऑफ इंडियाच्या वतीने राबविण्यात आलेल्या MSME क्रेडिट आउटरीच मोहिमेला उत्स्फूर्त प्रतिसाद मिळाला असून, या उपक्रमाअंतर्गत जिल्ह्यातील उद्योजकांसाठी ३० कोटी ५० लाख रुपयांहून अधिक कर्ज मंजूर करण्यात आले आहे. या मोहिमेमुळे अनेक उद्योजकांना उद्योग विस्तारासाठी आवश्यक आर्थिक पाठबळ मिळाले आहे.
सेंट्रल बँक ऑफ इंडियाच्या जळगाव प्रादेशिक कार्यालयाच्या मार्गदर्शनाखाली बीआरसीआर युनिट, जळगाव येथे आयोजित या कार्यक्रमात जिल्ह्यातील विविध औद्योगिक क्षेत्रातील उद्योजक मोठ्या संख्येने सहभागी झाले होते. यावेळी बँकेकडून विविध कर्ज योजना, टर्म लोन, खेळते भांडवल, अल्प व्याजदरातील कर्ज सुविधा तसेच सुलभ हप्त्यांवरील योजनांची सविस्तर माहिती देण्यात आली.
कार्यक्रमादरम्यान बँकेच्या वरिष्ठ अधिकाऱ्यांनी एमएसएमई क्षेत्र देशाच्या आर्थिक प्रगतीचा कणा असल्याचे नमूद करत, आत्मनिर्भर भारत अभियानात उद्योजकांची भूमिका महत्त्वाची असल्याचे सांगितले. कर्ज प्रक्रियेत पारदर्शकता ठेवून पात्र उद्योजकांना वेळेत वित्तपुरवठा करण्यावर बँकेचा भर असल्याचेही यावेळी स्पष्ट करण्यात आले.
या आउटरीच मोहिमेमुळे नवउद्योजकांसह विद्यमान उद्योगांना व्यवसाय विस्तार, यंत्रसामग्री खरेदी आणि रोजगारनिर्मितीसाठी आवश्यक भांडवल उपलब्ध होणार आहे. त्यामुळे जळगाव जिल्ह्यातील औद्योगिक विकासाला निश्चितच गती मिळेल, असा विश्वास उपस्थितांनी व्यक्त केला.
दरम्यान, यासंदर्भात प्रतिक्रिया व्यक्त करताना पुरोगामी पत्रकार संघाचे राष्ट्रीय महासचिव विनोद सुधाकर पवार यांनी सांगितले की, शासन आणि बँकांच्या विविध योजनांची माहिती अनेकदा सर्वसामान्य नागरिकांपर्यंत पोहोचत नाही. त्यामुळे अशा आउटरीच उपक्रमांची व्याप्ती वाढवून छोटे व्यावसायिक, ग्रामीण भागातील उद्योजक आणि नव्याने उद्योग सुरू करू इच्छिणाऱ्यांपर्यंत ही माहिती पोहोचवणे आवश्यक आहे, असे मत त्यांनी व्यक्त केले.
एमएसएमई आउटरीच मोहिमेमुळे जिल्ह्यात रोजगारनिर्मितीला चालना मिळून औद्योगिक विकासाचा वेग वाढेल, असा विश्वास कार्यक्रमाच्या शेवटी व्यक्त करण्यात आला.
