रुपेश देशमुख ( ब्रह्मपुरी प्रतिनिधी ) : छत्रपती शिवाजी महाराज यांच्या ३९६ व्या जयंतीनिमित्त ब्रह्मपुरी शहरातील कुर्झा प्रभागात विविध सामाजिक, सांस्कृतिक व क्रीडा उपक्रमांचे आयोजन करण्यात आले. कुर्झा महालक्ष्मी नगर व विद्यानगर उत्सव समिती तसेच सार्वजनिक शिवजयंती उत्सव समितीच्या वतीने आयोजित करण्यात आलेल्या या कार्यक्रमांना नागरिकांचा उत्स्फूर्त प्रतिसाद लाभला.
शिवजयंतीच्या औचित्याने १४ वर्षाखालील, १० वर्षाखालील व खुला गट अशा विविध वयोगटांतील महिला, पुरुष तसेच मुला-मुलींसाठी मॅरेथॉन दौड स्पर्धेचे आयोजन करण्यात आले होते. भैय्या राईस मिल ते जगनाडे महाराज चौक, विठ्ठल-रुक्मिणी मंदिर कुर्झा या मार्गावरून छत्रपती शिवरायांचा जयघोष करीत अनेक स्पर्धकांनी उत्साहात सहभाग नोंदविला. या स्पर्धेचा शुभारंभ नगराध्यक्ष योगेश मिसार, प्रथम नगराध्यक्ष तथा उद्योजक अशोक भैय्या व इतर मान्यवरांच्या हस्ते हिरवी झेंडी दाखवून करण्यात आला.
कुर्झा वार्डातील शिवाजी महाराज चौकात भव्य तीनदिवसीय शिवजयंती उत्सव साजरा करण्यात आला. कार्यक्रमास नगरसेवक, पत्रकार, शिक्षक, क्रीडा प्रशिक्षक व विविध क्षेत्रातील मान्यवर उपस्थित होते. विजेत्या स्पर्धकांना मान्यवरांच्या हस्ते सन्मानचिन्ह व रोख पारितोषिक देऊन गौरविण्यात आले.
भविष्यात राष्ट्रीय व आंतरराष्ट्रीय स्तरावरील धावपटू घडविण्याच्या उद्देशाने असे उपक्रम सातत्याने राबविले जातील, असा निर्धार आयोजकांनी यावेळी व्यक्त केला.
