रुपेश देशमुख (ब्रह्मपुरी प्रतिनिधी ) :
वाचनसंस्कृती रुजविण्याच्या उद्देशाने ब्रह्मपुरी शहरातील कुर्झा वार्डात सुरू करण्यात आलेल्या ‘पुस्तकाचे घर’ या उपक्रमातील वर्षभरातील उत्कृष्ट वाचक म्हणून श्रीराम विखार यांची निवड करण्यात आली. त्यांना नुकताच मान्यवरांच्या हस्ते ‘उत्कृष्ट वाचक’ पुरस्काराने गौरविण्यात आले.
कवी, लेखक, पत्रकार तसेच ३३ व्या झाडीबोली साहित्य संमेलनाचे अध्यक्ष डॉ. धनराज खानोरकर यांनी वाचनाची आवड निर्माण व्हावी यासाठी सुमारे एक लाख रुपयांची पुस्तके उपलब्ध करून ‘पुस्तकाचे घर’ हा अभिनव उपक्रम सुरू केला आहे. हा ग्रंथसहवास सर्व वाचकांसाठी मोफत खुला असून विविध विषयांवरील ग्रंथांचा लाभ नागरिक घेत आहेत.
श्री क्षेत्र आळंदी येथील ह.भ.प. माऊली महाराज जाहूरकर यांच्या शिवकीर्तन कार्यक्रमाचे औचित्य साधून श्रीराम विखार यांना उत्कृष्ट वाचक म्हणून सन्मानित करण्यात आले. या वेळी महाराजांच्या हस्ते शाल, श्रीफळ, स्मृतिचिन्ह व रोख रक्कम देऊन त्यांचा गौरव करण्यात आला. कार्यक्रमास संयोजक डॉ. धनराज खानोरकर, नगरपरिषदेचे माजी बांधकाम सभापती विलासभाऊ विखार, नगरसेवक चंद्रकांत बावनकुळे, सुखदेव खेत्रे आदी मान्यवर उपस्थित होते.
‘पुस्तकाचे घर’ मध्ये सर्वाधिक पुस्तके वाचून त्यातील आशय आत्मसात करून कथन करणाऱ्या वाचकाचा दरवर्षी शिवजयंती उत्सवाप्रसंगी गौरव करण्यात येईल, असे आवाहन संयोजकांनी यावेळी केले.
