विनोद पवार (जळगाव प्रतिनिधी) : फक्त एका चुकीच्या क्लिकने आयुष्याची पुंजी गायब! तंत्रज्ञान जितकं सोयीचं, तितकंच धोकादायक ठरत असल्याचं पुन्हा एकदा समोर आलं आहे. भुसावळ येथील ७१ वर्षीय निवृत्त शिक्षक सायबर फसवणुकीचे बळी ठरले असून, अज्ञात सायबर चोरट्यांनी त्यांच्या बँक खात्यातून तब्बल ८ लाख ५८ हजार १२२ रुपये लंपास केल्याने खळबळ उडाली आहे.
आजारी असल्याने औषधांची यादी मोबाईलवर डाऊनलोड करत असताना, चुकून एका संशयास्पद लिंकवर क्लिक झालं. धोका लक्षात येताच त्यांनी लिंक डिलीट केली आणि मोबाईल बाजूला ठेवून विश्रांती घेतली. मात्र, याच काळात सायबर चोरट्यांनी त्यांच्या पंजाब नॅशनल बँक खात्यावर डल्ला मारला.
धक्कादायक बाब म्हणजे,
एकही ओटीपी आला नाही
कोणतीही गोपनीय माहिती दिली नाही
तरीही टप्प्याटप्प्याने संपूर्ण रक्कम काढून घेण्यात आली.
१५ सप्टेंबर रोजी खाते तपासल्यानंतर हा प्रकार उघडकीस आला. तात्काळ जळगाव सायबर पोलीस ठाण्यात तक्रार दाखल करण्यात आली असून, अज्ञात सायबर चोरट्यांविरोधात गुन्हा दाखल करून पोलिसांनी तपास सुरू केला आहे.
एका चुकीच्या क्लिकमुळे लाखोंची फसवणूक
सायबर सुरक्षेचा निष्काळजीपणा ठरतोय महागात
ही घटना प्रत्येक नागरिकासाठी इशारा देणारी असून, सायबर लिंक, अॅप्स व कॉल्सबाबत अधिक सतर्क राहण्याची गरज निर्माण झाली आहे.
