संघराज गायकवाड, राहुल आढाव (दौंड प्रतिनिधी) : शहरातील बोरावके नगर ते देव पामदरम्यान महिनोन्महिने रखडलेले रस्त्याचे काम अखेर सुरू करण्यात आले आहे. यापूर्वी या रस्त्याची दुरवस्था, अर्धवट काम आणि नागरिकांना होत असलेल्या त्रासाबाबत प्रसिद्ध झालेल्या बातमीनंतर प्रशासन व ठेकेदाराकडून तातडीने हालचाली करण्यात आले. दौंड नगरपरिषद व महाराष्ट्र शासन अंतर्गत मंजूर असलेल्या बोरावके नगर ते देव पाम मार्गावर प्रत्यक्षात डांबरीकरण व रोलरच्या सहाय्याने रस्ता तयार करण्याचे काम सुरू झाले असून यंत्रसामग्री व कामगार तैनात करण्यात आले आहेत.
मागील काही महिन्यांपासून हे काम सरपंच वस्ती, संविधान तिरंगा चौकापर्यंतच मर्यादित राहिले होते. त्यापुढील भागात केवळ खडी टाकून रस्ता अर्धवट ठेवण्यात आल्याने दुचाकीस्वार, शाळकरी मुले, महिला व ज्येष्ठ नागरिकांना मोठा त्रास सहन करावा लागत होता. अपघाताचा धोका देखील वाढला होता. या प्रकरणावर बातमी प्रसिद्ध झाल्यानंतर अवघ्या काही दिवसांत प्रत्यक्ष ठिकाणी डांबरीकरण व रस्त्याचे समतलीकरण सुरू झाल्याने नागरिकांनी समाधान व्यक्त केले आहे. मात्र उर्वरित संपूर्ण रस्ता वेळेत आणि दर्जेदार पद्धतीने पूर्ण करावा, अशी मागणी परिसरातील नागरिकांकडून करण्यात येत आहे.
