मध्यरात्रीची घाई कशासाठी? दौंडमध्ये रस्त्याचे काम संशयाच्या भोवऱ्यात
संघराज गायकवाड, राहुल आढाव (दौंड प्रतिनिधी) : शहरातील गांधी चौक परिसरात जोगळेकर हॉटेलच्या मागील भागात काल रात्री सुमारे १२.३० वाजता रस्त्याचे काँक्रीटीकरण व दुरुस्तीचे काम सुरू असल्याचे चित्र समोर आले आहे.प्रत्यक्ष पाहणीदरम्यान रस्त्यावर खडी, सिमेंट व इतर साहित्य टाकण्यात आले होते. काँक्रीट मिक्सर, पंप मशीन आणि पाण्याच्या टँकरच्या सहाय्याने रस्ता तयार करण्याचे काम सुरू होते. अनेक कामगार रात्री उशिरापर्यंत काम करताना दिसून आले.
या कामाबाबत नागरिकांनी महत्त्वाचा सवाल उपस्थित केला आहे की, हे काम ठेकेदाराकडून नेमके कधीपासून सुरू आहे? तसेच रात्री १२.३० वाजेपर्यंत काम सुरू ठेवण्यासाठी कोणती अधिकृत परवानगी देण्यात आली आहे का?सदर परिसर हा दौंड नगरपालिकेच्या हद्दीतील आहे. त्यामुळे या कामासाठी नगरपालिकेची अधिकृत मंजुरी आवश्यक आहे.नियमांनुसार रस्त्याची कामे रात्री करता येतात, मात्र त्यासाठी संबंधित प्रशासनाची परवानगी असणे आवश्यक असून, रात्री १० नंतर मोठा आवाज करणाऱ्या यंत्रांच्या वापरासाठी विशेष परवानगी बंधनकारक आहे.
दरम्यान, कामाच्या ठिकाणी पुरेशा प्रमाणात सूचना फलक व सुरक्षेसाठी बॅरिकेड्स नसल्याचेही दिसून आले. त्यामुळे रात्री ये-जा करणाऱ्या नागरिकांना व वाहनचालकांना अडचणींचा सामना करावा लागत आहे.ठेकेदाराने हे काम नेमके कधीपासून सुरू केले, रात्री कामासाठी परवानगी आहे की नाही आणि याबाबत दौंड नगरपालिकेची भूमिका काय, याचा खुलासा करण्याची मागणी स्थानिक नागरिकांकडून होत आहे.
