दौंड- (प्रतिनिधी संघराज गायकवाड,राहुल आढाव)- दौंड शहरातील गोपाळडी रोड, सरपंच वस्ती येथील राजमाता जिजाऊ ज्येष्ठ नागरिक विरंगुळा केंद्र परिसरात शासकीय जागेचा गैरवापर होत असल्याबाबत प्रसिद्ध झालेल्या बातमीचा मोठा परिणाम दिसून आला आहे. या बातमीत शासकीय जागेत रंगकाम करणारी गाडी (वाहन क्रमांक MH 14 CK 1384) पार्क केल्याचा प्रकार उघडकीस आला होता.
बातमी प्रसिद्ध होताच संबंधित विभाग व स्थानिक नागरिकांमध्ये तीव्र संताप व्यक्त करण्यात आला. याची दखल घेत संबंधित वाहनचालक व रंगकाम करणाऱ्या व्यक्तीने तात्काळ शासकीय जागेतून गाडी बाहेर काढली. तसेच, सार्वजनिक जागेचा गैरवापर झाल्याबद्दल जाहीर माफी मागण्यात आली.
“ही चूक अनवधानाने झाली असून भविष्यात अशा प्रकारची पुनरावृत्ती होणार नाही,” असे वाहनचालकाकडून सांगण्यात आले. स्थानिक नागरिकांनी बातमीच्या माध्यमातून हा प्रकार समोर आणल्याबद्दल समाधान व्यक्त केले असून, अशा प्रकारच्या गैरप्रकारांवर कठोर कारवाई व्हावी, अशी मागणी केली आहे.
या घटनेमुळे पुन्हा एकदा स्पष्ट झाले आहे की, पत्रकारितेचा प्रभाव आणि जनजागृतीमुळे शासकीय जागेच्या संरक्षणासाठी ठोस पावले उचलली जाऊ शकतात. प्रशासनाने देखील अशा प्रकारांवर कायमस्वरूपी नियंत्रण ठेवावे, अशी अपेक्षा नागरिकांकडून व्यक्त केली जात आहे.
