दौंड (प्रतिनिधी संघराज गायकवाड,राहुल आढाव): दौंड शहरातील गोपाळवाडी रोडवरील सरपंच वस्ती परिसरात असलेल्या राजमाता जिजाऊ जेष्ठ नागरिक विरंगुळा केंद्र येथील शासकीय जागेच्या गैरवापराचा प्रकार उघडकीस आला आहे. विशेष म्हणजे, हे विरंगुळा केंद्र बहुतांश वेळा टाळे लावून बंद ठेवले जाते, मात्र असे असतानाही केंद्राच्या कंपाउंडच्या आत खासगी चारचाकी वाहन उभे करण्यात येत आहे.
जेष्ठ नागरिकांसाठी विरंगुळा केंद्र की पार्किंग?
दौंड नगरपालिकेने नव्याने बांधलेल्या या विरंगुळा केंद्राचा उपयोग जेष्ठ नागरिकांसाठी व्हावा, हा उद्देश असताना प्रत्यक्षात मात्र केंद्र बंद ठेवून शासकीय जागेचा खासगी पार्किंगसाठी वापर होत असल्याचे चित्र आहे. याठिकाणी MH 14 CA 1384 क्रमांकाचे वाहन पार्क करण्यात आले असल्याचे निदर्शनास आले असून, संबंधित वाहनावर दौंड नगरपालिकेने दंडात्मक कारवाई करावी, अशी मागणी नागरिकांकडून होत आहे. जेष्ठ नागरिकांसाठी असलेले केंद्र बंद अवस्थेत ठेवणे आणि त्याच ठिकाणी खासगी वाहन उभे करणे हे गंभीर असून, यामुळे शासकीय मालमत्तेचा दुरुपयोग होत असल्याचा आरोप नागरिकांनी केला आहे..
या प्रकरणाची तातडीने चौकशी करून दोषींवर कारवाई करावी, तसेच शासकीय नियमांचे उल्लंघन करणाऱ्या वाहनांवर दंड आकारावा, अशी मागणी जोर धरत आहे. दौंड नगरपालिका प्रशासन यावर काय भूमिका घेते, याकडे नागरिकांचे लक्ष लागले आहे.
