दौंड (प्रतिनिधी संघराज गायकवाड, मयूर साळवे) : दौंड पोलीस स्टेशन हद्दीत गोवंश हत्या व संबंधित गंभीर गुन्ह्यांमध्ये सहभागी असलेल्या तीन सराईत आरोपींवर पोलिसांनी कठोर कारवाई करत त्यांना दोन वर्षांसाठी तडीपार केले आहे. या कारवाईमुळे परिसरातील कायदा व सुव्यवस्था राखण्यास मदत होणार असल्याचा विश्वास पोलिसांनी व्यक्त केला आहे.
या प्रकरणातील आरोपींमध्ये टोळी प्रमुख लड्डू उर्फ हसन हाश्मी कुरेशी (वय २२) याच्यासह जमिल इस्माईल कुरेशी (वय ४५) आणि फैजान अब्दुल कुरेशी (वय ३८), सर्व रा. खाटीक गल्ली, दौंड यांचा समावेश आहे. या तिघांवर गोवंश जातीच्या गायींची बेकायदेशीर कत्तल करणे तसेच कत्तलीच्या उद्देशाने जनावरे डांबून ठेवणे यांसारखे गंभीर गुन्हे दाखल होते.
आरोपींच्या सततच्या गुन्हेगारी कृत्यांमुळे नागरिकांच्या धार्मिक भावना दुखावल्या जात होत्या. तसेच दौंड शहर आणि परिसरात कायदा व सुव्यवस्थेचा प्रश्न निर्माण झाला होता. या पार्श्वभूमीवर पोलिसांनी या प्रकरणाची गंभीर दखल घेतली.
पोलीस निरीक्षक गोपाळ पवार यांनी महाराष्ट्र पोलीस कायदा कलम ५५ अंतर्गत तडीपार प्रस्ताव सादर केला होता. या प्रस्तावावर सुनावणी घेऊन पोलीस अधीक्षक संदीप सिंह गिल यांनी संबंधित तिन्ही आरोपींना पुढील दोन वर्षांसाठी पुणे जिल्ह्यातील दौंड, बारामती, हवेली, इंदापूर तसेच अहिल्यानगर जिल्ह्यातील श्रीगोंदा तालुक्यातून तडीपार करण्याचे आदेश दिले आहेत.
दरम्यान, तडीपार आदेशाचे उल्लंघन केल्यास संबंधित आरोपींवर कठोर कायदेशीर कारवाई करण्यात येईल, असा इशाराही पोलिसांनी दिला आहे. या कारवाईमुळे परिसरात सुरक्षिततेची भावना निर्माण होईल, अशी अपेक्षा व्यक्त केली जात आहे.
