Times of Maharashtra Desk : काल सायंकाळी रात्री सात वाजण्याच्या सुमारास राजधानी दिल्लीतील ऐतिहासिक लाल किल्ल्याजवळील मेट्रो स्टेशनच्या गेट क्रमांक १ बाहेर तीव्र स्फोट झाला. एका धीम्या गतीने चालणाऱ्या ह्युंदाई आय-२० कारमध्ये हा स्फोट झाला ज्यामुळे कारला आग लागली आणि ती जवळच्या इतर अनेक वाहनांपर्यंत पसरली. या भीषण दुर्घटनेत आतापर्यंत ९ जणांचा मृत्यू झाला असून २०हून अधीक लोक जखमी झाले आहेत. मृतांमध्ये एका बस कंडक्टरचा समावेश आहे. जखमींना एलएनजेपी रुग्णालयात दाखल करण्यात आले आहे.हा स्फोट इतका जोरदार होता की त्याचा आवाज काही किलोमीटरपर्यंत ऐकू आला आणि परिसरातील इमारतींच्या काचा फुटल्या असे प्रत्यक्षदर्शी लोकांनी सांगितले.
या घटनेनंतर दिल्लीत हाय अलर्ट जारी करण्यात आला असून विविध सुरक्षा यंत्रणांनी तपास सुरू केला आहे. दिल्ली पोलिसांनी युएपीए आणि स्फोटक पदार्थ कायद्याच्या संबंधित कलमांखाली एफआयआर दाखल केला आहे. केंद्रीय गृहमंत्री अमित शहा यांनी घटनास्थळी भेट देऊन परिस्थितीचा आढावा घेतला असून जखमींची रुग्णालयात विचारपूस केली आहे. या स्फोटामागे आत्मघातकी दहशतवादी हल्ला असल्याचा गुप्तचर संस्थांना संशय आहे. केंद्रीय गृह मंत्रालयाने एनआयए, एनएसजी आणि फॉरेन्सिक टीम्सना तपासात समन्वय साधण्याचे निर्देश दिले आहेत.
तपासादरम्यान, स्फोट झालेल्या कारचा संबंध थेट जम्मू-कश्मीरमधील पुलवामा येथील एका व्यक्तीपर्यंत पोहोचल्याचे प्राथमिक तपासात उघड झाले आहे. स्फोट झालेल्या कारचा नोंदणीकृत मालक मोहम्मद सलमान याला पोलिसांनी ताब्यात घेतले आहे. त्याने कार सुमारे दीड वर्षांपूर्वी विकल्याचे सांगितले आहे. पोलीस सीसीटीव्ही फुटेजच्या आधारे स्फोटकांसह कार चालवणाऱ्या डॉक्टर मुज्जमिल गनाई याचा शोध घेत आहेत. हा स्फोट काही दिवसांपूर्वी हरियाणातील फरिदाबाद येथे जैश-ए-मोहम्मदशी संबंधित एका दहशतवादी मॉड्युलचा पर्दाफाश करून २९०० किलो स्फोटके आणि शस्त्रास्त्रे जप्त करण्यात आल्यानंतर घडली आहे.
सध्या सुरक्षा यंत्रणा तपास करत असून, या घटनेचे संपूर्ण सत्य लवकरच समोर येईल आणि दोषींना कोणत्याही परिस्थितीत सोडले जाणार नाही असे संरक्षण मंत्री राजनाथ सिंह यांनी स्पष्ट केले आहे. देशभरात विशेषतः संवेदनशील आणि गर्दीच्या ठिकाणी सुरक्षा वाढवण्यात आली आहे.
#DelhiBlast #RedFortExplosion #DelhiHighAlert #TerrorAttack #NIAInvestigation #NSG #AmitShah #RajNathSingh #PulwamaLink #DelhiPolice #CarExplosion #LNJPHospital #IndiaNews #BreakingNews #TimesOfMaharashtra #SecurityAlert #DelhiMetro #Hyundaii20 #MohammadSalman #MuzzammilGanaie #ForensicInvestigation #UAPA #ExplosivesAct #NationalSecurity #Terrorism
