बॅरिकेडिंग नाही, चेतावणी नाही; पुण्यातील विकासकामे नागरिकांसाठी धोक्याची घंटा
“कंत्राटदार बेफाम, अधिकारी गाफील; पुण्यात Safety Compliance ची उघड पायमल्ली”
पुणे :- शहरातील विकासकामे आता थेट नागरिकांच्या जीवावर उठली आहेत का, असा संतप्त सवाल उपस्थित झाला असून जुना मोटर स्टँड चौक ते अलंकार मेडिकल दरम्यान सुरू असलेल्या रस्त्याच्या कामात ख्वाजा गरीब नवाज एंटरप्राइजेस या कंत्राटदाराचा बेजबाबदारपणा उघडपणे समोर आला आहे. या ठिकाणी काम सुरू असताना आवश्यक असलेली कोणतीही सुरक्षा मानके पाळण्यात आलेली नसून, पुणे महानगरपालिकेच्या कामाच्या आदेशातील स्पष्ट अट क्रमांक १४ अर्थात Safety Compliance ची अक्षरशः पायमल्ली करण्यात येत आहे.
कामाच्या ठिकाणी विद्युत वायरी, केबल्स, साहित्य आणि अन्य धोकादायक वस्तू उघड्यावर टाकण्यात आलेल्या असून, कोणतीही संरक्षक व्यवस्था करण्यात आलेली नाही. अधिक धक्कादायक बाब म्हणजे याच परिसरात लहान मुले खेळत असल्याचे फोटो उपलब्ध झाले आहेत. अशा परिस्थितीत एखादा अपघात घडल्यास त्याची जबाबदारी कोण घेणार, असा गंभीर प्रश्न निर्माण झाला आहे. काम सुरू असलेल्या ठिकाणी ना बॅरिकेडिंग, ना चेतावणी फलक, ना सुरक्षारक्षक, अशा अवस्थेत नागरिक विशेषतः लहान मुले थेट मृत्यूच्या दारात उभी असल्याचे चित्र आहे.
ख्वाजा गरीब नवाज एंटरप्राइजेस या कंत्राटदारांकडून बेफाम आणि बेजबाबदारपणे काम सुरू असून, अपघात झाला तर संपूर्ण जबाबदारी कंत्राटदाराची असल्याचे करारनाम्यात स्पष्ट असतानाही, त्याकडे सर्रास दुर्लक्ष करण्यात येत आहे. हे केवळ निष्काळजीपणाचे उदाहरण नसून, नागरिकांच्या जीवाशी थेट खेळ करण्याचा प्रकार असल्याचा आरोप केला जात आहे. विशेष म्हणजे, एवढा गंभीर प्रकार सुरू असतानाही पुणे महानगरपालिकेचे संबंधित अभियंते, अधिकारी आणि पर्यवेक्षक यांचे या कामाकडे लक्ष नसल्याचे स्पष्टपणे दिसून येत आहे.
रस्त्याच्या कामासाठी कोट्यवधी रुपये खर्च होत असताना, त्यातील किमान सुरक्षिततेच्या अटीही पाळल्या जात नसतील, तर हा विकास आहे की व्यवस्थेचा ऱ्हास, असा प्रश्न पुणेकर विचारू लागले आहेत. करारात नमूद असलेल्या अटींचे उल्लंघन होत असतानाही जर मनपा प्रशासन डोळेझाक करत असेल, तर ही बाब केवळ कंत्राटदारापुरती मर्यादित न राहता थेट अधिकाऱ्यांच्या कर्तव्यच्युतीकडे निर्देश करते.
जर या ठिकाणी एखादा गंभीर अपघात झाला, एखाद्या लहान मुलाला इजा झाली किंवा जीवितहानी झाली, तर त्याची नैतिक आणि कायदेशीर जबाबदारी कंत्राटदारासह संबंधित मनपा अधिकाऱ्यांवरही येणार आहे. मात्र अपघात घडल्यानंतर चौकशी आणि कारवाई करण्यापेक्षा, आधीच नियमांची अंमलबजावणी करण्याची जबाबदारी प्रशासनाने पार पाडली पाहिजे, अशी मागणी आता जोर धरू लागली आहे.
पुणे शहरात विकासाच्या नावाखाली सुरू असलेल्या कामांमध्ये नागरिकांच्या सुरक्षेला जर अशा प्रकारे तिलांजली दिली जात असेल, तर हे काम थांबवून तातडीने चौकशी करावी, संबंधित कंत्राटदारावर कठोर कारवाई करावी आणि जबाबदार अधिकाऱ्यांवरही कारवाईचा बडगा उगारावा, अशी मागणी नागरिक, सामाजिक कार्यकर्ते आणि जागरूक पुणेकरांकडून होत आहे. अन्यथा, हा प्रश्न केवळ वृत्तपत्रांच्या पानांपुरता न राहता थेट न्यायालयाच्या दालनात जाण्याची शक्यता नाकारता येत नाही.
