Times of Maharashtra Desk: आज सकाळपासून म्हणजेच १० डिसेम्बर रोजी बारामतीमध्ये अंमलबजावणी संचालनालयाने (ED) मोठी कारवाई सुरू केली असून आनंद सतीश लोखंडे आणि विद्या सतीश लोखंडे यांच्या राहत्या घरावर छापे टाकण्यात आले आहेत. ही कारवाई जळोची गावासह बारामती परिसरात सुरू आहे. पुणे आणि मुंबईतील दूध डेअरी व्यवसायिकांना लाखो रुपयांचा गंडा घालण्यात आल्याच्या तक्रारीनंतर ही छापेमारी करण्यात आली आहे.
मिळालेल्या माहितीनुसार, लोखंडे दाम्पत्याने दुग्ध व्यवसायात मोठे व्यवहार करण्याचे आमिष दाखवून गुंतवणूकदारांकडून १० कोटी रुपयांहून अधिक रकमेची फसवणूक केल्याचा आरोप आहे. मंत्रालयातील काही अधिकाऱ्यांनाही गुंतवणूक प्रस्ताव दाखवून पैसे उकळल्याचे समोर आले आहे.बारामती डेअरी प्रायव्हेट लिमिटेडने दाखल केलेल्या १०,२१,५९,३६७ रुपयांच्या तक्रारीच्या आधारे ईडीने ही कारवाई केली आहे. चौकशीदरम्यान आनंद आणि विद्या लोखंडे यांनी तरुण उद्योजक असल्याचे भासवून स्वतःला एका प्रभावशाली राजकीय नेत्याचे समर्थक असल्याचा दावा करून विश्वासार्हता निर्माण केली असल्याचे उघड झाले.
स्रोतांनुसार, लोखंडे दाम्पत्याने मुंबईतील एका कंपनीकडून २ कोटी रुपयांचे लोणी खरेदी केले आणि आठवड्यात पैसे देण्याचे आश्वासन दिले, मात्र पेमेंट कधीही करण्यात आले नाही. तसेच दूध पुरवठा करण्याच्या नावाखाली ९३ लाख रुपये घेण्यात आले, पण पुरवठा झाला नाही. दूध व्यवसायिकांना नफा देण्याच्या बहाण्याने ६.४३ कोटी रुपयांची बिलं उभी करण्यात आली, मात्र निधीचा गैरवापर करण्यात आला. अनेक व्यवहारांमध्ये दिलेले धनादेश बाउन्स झाल्याचेही समोर आले आहे.
या प्रकरणात अनेक गुंतवणूकदारांनी मुंबई आर्थिक गुन्हे अन्वेषण विभागाकडे (EOW) तक्रारी दाखल केल्या असून ईडीकडून आर्थिक प्रवाह, खाते व्यवहार आणि संबंधितांच्या मालमत्तांची तपासणी सुरू आहे.या धाडीमुळे बारामती परिसरात खळबळ उडाली असून पुढील काही दिवसांत आणखी खुलासे होण्याची शक्यता व्यक्त केली जात आहे.
