विनोद पवार ( जळगांव प्रतिनिधी ) : सोशल मीडियावर बेधडक पोस्ट करणाऱ्या सरकारी कर्मचारी आणि अधिकाऱ्यांना आता मोठा झटका बसणार आहे. राज्य सरकारने फेसबुक, एक्स (ट्विटर), इन्स्टाग्रामसह सर्व डिजिटल प्लॅटफॉर्मवर कडक आचारसंहिता लागू केली असून नियम मोडल्यास थेट शिस्तभंगाची कारवाई होणार आहे.
मंत्रिमंडळाच्या बैठकीत ‘न्यायिक अधिकारी आचारसंहिता नियम 2026’ मंजूर करण्यात आले आहेत. या नव्या नियमांनुसार सरकारी पदाचा उल्लेख करून पोस्ट करणे, प्रशासकीय निर्णयांवर टीका करणे, राजकीय विषयांवर प्रतिक्रिया देणे किंवा संवेदनशील विषयांवर मतप्रदर्शन करणे कठोर मनाईस राहील.
सोशल मीडियावर सरकारची प्रतिमा मलीन करणारी माहिती पसरवणे, गोपनीय कागदपत्रे उघड करणे किंवा प्रशासनाच्या कामात अडथळा आणणारे वक्तव्य केल्यास वेतनवाढ रोखणे, निलंबन, पदावनती किंवा कठोर प्रशासकीय कारवाई केली जाईल.
सरकारी कर्मचाऱ्यांनी सोशल मीडियाचा वापर आता अत्यंत संयमाने आणि जबाबदारीने करावा, अशी स्पष्ट सूचना प्रशासनाकडून देण्यात आली आहे. नव्या नियमांमुळे ऑनलाईन हालचालींवर कडक नजर ठेवली जाणार असून सोशल मीडियावरील मनमानीला पूर्णविराम मिळणार आहे.
