प्रवीण चौधरी (परभणी प्रतिनिधी) : परभणी शहरात आजपासून हजरत सय्यद शाह तुराबुल हक साहेब (रहे.) यांचा वार्षिक उरुस उत्साहात सुरू झाला आहे. वार्षिक उरुसासाठी भाविकांची मोठी उपस्थिती असून धार्मिक वातावरण पाहण्यासारखे आहे.
जिल्हाधिकारी संजयसिंह चव्हाण, जिल्हा पोलीस अधीक्षक रवींद्रसिंह परदेशी, निवासी उपजिल्हाधिकारी अनुराधा ढालकरी आणि तहसीलदार डॉ. संदीप राजापुरे यांच्या प्रमुख उपस्थितीत उरुसाचे औपचारिक विधी पार पाडले गेले. विशेष म्हणजे, संदल प्रक्रियेत जिल्हाधिकारी श्री. चव्हाण यांनी स्वतः तबक डोक्यावर घेऊन विधीला रीतसर सुरुवात केली.
उरुसाच्या दरम्यान भाविकांसाठी प्रशासनाकडून सर्व सुविधा उपलब्ध करून देण्यात आल्या आहेत. भाविकांच्या सुरक्षिततेसाठी पोलीस आणि प्रशासनाचे विशेष पथक तैनात आहे. तसेच, उरुसाच्या गर्दीला ओळखून स्वच्छता, मार्गदर्शन आणि आरोग्यसेवा यासह आवश्यक सोयी करण्यात आल्या आहेत.
वार्षिक उरुसामुळे शहरात भक्ती आणि उत्साहाचे वातावरण निर्माण झाले आहे. स्थानिक तसेच बाहेरून आलेले भाविक या धार्मिक विधीत सहभागी होऊन प्रार्थना करीत आहेत.
