हा अपघात रात्री आठच्या सुमारास घडला. राजस्थानमधून निघालेला आणि मुंबईमार्गे बंगळुरूकडे जाणारा ट्रेलर चांदणी चौकाजवळील रस्त्याच्या कामाजवळ पोहोचला असताना समोरून एक इर्टिगा कार अचानक आडवी आली. ट्रेलर चालकाने कारला वाचवण्यासाठी जोरात ब्रेक दाबला. परिणामी, ट्रेलरमध्ये लोड करण्यात आलेल्या लोखंडी सळ्या आणि पाईप्स पुढे सरकत चालकाच्या केबिनमध्ये घुसल्या. या भीषण अपघातात चालकाचा जागीच मृत्यू झाला, तर त्याच्यासोबत असलेल्या सहकाऱ्याचाही मृत्यू झाला.
Advertisement by Unique Computers
👇👇Click the Image below👇👇
Advertisement by Unique Computers
👆👆Click the Image below👆👆
अपघातानंतर घटनास्थळी पोलीस, अग्निशमन दल, जेसीबी आणि क्रेनच्या मदतीने अडकलेल्या चालकाला बाहेर काढण्याचे शर्थीचे प्रयत्न करण्यात आले. अपघातानंतर काही काळ त्याची हालचाल दिसून आली, मात्र अर्ध्या तासाच्या प्रयत्नांनंतर तो मृत असल्याचे स्पष्ट झाले. मृत चालक हा ट्रेलरचा मालक असल्याचेही उघड झाले आहे.
या घटनेमुळे मुंबई-बंगळुरू महामार्गावरील वाहतूक पूर्णतः विस्कळीत झाली होती. मुंबई आणि कोल्हापूरकडे जाणाऱ्या वाहनांच्या रांगा सूसपर्यंत आणि पुढे वारजेपर्यंत लागल्या होत्या, अशी माहिती स्थानिक तरुण शुभम भुंडे यांनी दिली.
सध्या हिंजवडी पोलिस ठाण्याच्या हद्दीत या प्रकरणाचा तपास सुरू आहे. इर्टिगा कारचा चालक अद्याप फरार असून, पोलीस त्याचा शोध घेत आहेत.
