Times of Maharashtra Desk: भारत आणि चीनमधील संबंध गेल्या काही वर्षांत मोठ्या तणावातून गेले असले तरी आता पुन्हा या दोन्ही देशात सहकार्य आणि संवाद वाढवण्याच्या दिशेने महत्त्वाचे पाऊल उचलले जात आहे. जवळपास पाच वर्षांपूर्वी गलवान खोऱ्यात दोन्ही देशांच्या सैनिकांमध्ये झालेल्या हिंसक चकमकीनंतर संबंधांमध्ये तीव्र तणाव निर्माण झाला होता आणि त्याचा परिणाम म्हणून चिनी नागरिकांसाठी दिल्या जाणाऱ्या पर्यटक व्हिसावर बंदी घालण्यात आली होती. मात्र, अनेक फेऱ्यांच्या राजनैतिक चर्चेनंतर आणि कमांडर-स्तरीय बैठकीनंतर दोन्ही बाजूंनी तटस्थता आणि संवादाचा मार्ग स्वीकारला आहे. या पार्श्वभूमीवर चीनने अलीकडेच भारतीय नागरिकांसाठी पर्यटन व्हिसा पुन्हा सुरू करत विश्वासार्हतेचा संकेत दिला होता.
या प्रक्रियेत आणखी एक सकारात्मक पाऊल म्हणून भारतातील चिनी राजदूत झू फेईहोंग यांनी सोमवारी जाहीर केले की चीन भारतासाठी ऑनलाइन व्हिसा अर्ज प्रणाली सुरू करत आहे. ही प्रणाली २२ डिसेंबरपासून अधिकृतपणे सुरू होणार असून अर्जदारांना ऑनलाइन माध्यमातून प्रक्रिया पूर्ण करण्याची सुविधा उपलब्ध होणार आहे. अर्जदार visaforchina.cn/DEL3_EN/qianzh या वेबसाइटवर जाऊन फॉर्म भरू शकतील आणि आवश्यक कागदपत्रे अपलोड करू शकतील. तसंच नवी दिल्लीतील शिवाजी स्टेडियम मेट्रो स्टेशन येथे असलेल्या चीनच्या व्हिसा सेवा केंद्राचा पत्ता, संपर्क क्रमांक आणि कामकाजाचा वेळदेखील औपचारिकरीत्या जाहीर करण्यात आला आहे. सोमवार ते शुक्रवार सकाळी ९ ते दुपारी ३ या वेळेत नागरिक प्रत्यक्ष सेवांचा लाभ घेऊ शकतात.
या निर्णयामुळे भारत-चीन संबंधांमध्ये सकारात्मक घडामोडी होत आहेत आणि दोन्ही देशांतील व्यापार, पर्यटन, शिक्षण आणि सांस्कृतिक आदानप्रदानासाठी नवीन दारे उघडली जात आहेत. सध्याच्या परिस्थितीत ही घोषणा फक्त औपचारिक निर्णय नसून दोन मोठ्या आशियाई देशांमधील विश्वास पुनर्स्थापित करण्याच्या दिशेने उचललेले महत्त्वपूर्ण पाऊल मानले जात आहे. पुढील काळात या निर्णयामुळे दोन्ही देशांमधील संबंध अधिक सहकार्यपूर्ण आणि स्थिर होण्याची अपेक्षा व्यक्त केली जात आहे
