विनोद पवार ( जळगाव प्रतिनिधी ) : नवीन नगरसेवक निवडीनंतर जळगाव महानगरपालिकेची पहिलीच स्थायी समितीची सभा सभापती डॉ. चंद्रशेखर पाटील यांच्या अध्यक्षतेखाली पार पडली. या सभेत महानगरपालिका आयुक्त ज्ञानेश्वर ढेरे यांनी सन २०२५–२६ या आर्थिक वर्षासाठी शिल्लकीसह सुमारे साडेआठ कोटी रुपयांचे अंदाजपत्रक सादर केले.
यासोबतच १४६२ कोटी रुपयांचे मूळ अंदाजपत्रक सभेपुढे मांडण्यात आले असून त्यावर स्थायी समितीकडून सविस्तर अभ्यास केला जाणार आहे. त्यानंतर हे अंदाजपत्रक मंजुरीसाठी महासभेपुढे ठेवण्यात येणार आहे.
या सभेला आयुक्त ज्ञानेश्वर ढेरे, अतिरिक्त आयुक्त शोभा बाविस्कर, उपायुक्त धनश्री शिंदे, उपायुक्त प्रशासन निर्मला पेखळे गायकवाड, तसेच नगरसचिव सतीश शुक्ला उपस्थित होते. सभेच्या सुरुवातीला आयुक्त ढेरे यांच्या हस्ते नव्याने निवडून आलेल्या सभापती डॉ. चंद्रशेखर पाटील यांचे स्वागत करण्यात आले.
यानंतर आयुक्त ढेरे यांनी सन २०२५–२६ चे सुधारित आणि सन २०२६–२७ चे मूळ अंदाजपत्रक सभेपुढे सादर केले. अंदाजपत्रकातील विविध तरतुदी, जमा-खर्च आणि महसूल वाढीबाबत त्यांनी सभागृहात सविस्तर माहिती दिली.
मालमत्ता कराच्या माध्यमातून सन २०२५–२६ मध्ये सुमारे ११८ कोटी रुपयांचे सुधारित उत्पन्न अपेक्षित असल्याचे त्यांनी सांगितले. शहरातील सर्व मालमत्तांचे सर्वेक्षण पूर्ण करण्यात आले असून वार्षिक भाडेमूल्य निर्धारणाचे कामही पूर्ण झाले आहे. त्यामुळे महानगरपालिकेच्या उत्पन्नात साधारणपणे ५ कोटी रुपयांची वाढ होण्याची शक्यता व्यक्त करण्यात आली.
दरम्यान, अंदाजपत्रकातील विविध तरतुदींवर स्थायी समिती सदस्यांकडून चर्चा करण्यात आली असून पुढील सभेत यावर अधिक सविस्तर विचारविनिमय होणार आहे.
