विनोद पवार (जळगाव प्रतिनिधी) : शहरातील पिंपळा परिसरात किरकोळ वादाचे गंभीर पर्यवसान होऊन एका तरुणाचा जीव गेल्याने परिसरात एकच खळबळ उडाली आहे. पिंपळा येथील प्रशांत पाटील चौकात १ फेब्रुवारी रोजी झालेल्या क्षुल्लक वादातून २२ वर्षीय शुभम गजानन सपकाळे याच्यावर काही तरुणांनी निर्घृण हल्ला केला होता. आरोपींनी शुभमला लाथाबुक्क्यांनी मारहाण करत लाकडी दांडक्याने डोक्यावर व पाठीवर जोरदार वार केले. या हल्ल्यात शुभम गंभीर जखमी झाला.
घटनेनंतर जखमी अवस्थेत शुभमला तातडीने उपचारासाठी मुंबईतील जे.जे. रुग्णालयात दाखल करण्यात आले होते. मात्र, उपचार सुरू असतानाच शुभमने प्राण सोडले. या दुर्दैवी घटनेमुळे सपकाळे कुटुंबावर दुःखाचा डोंगर कोसळला असून परिसरात हळहळ व्यक्त होत आहे.
या प्रकरणी रामानंदनगर पोलीस ठाण्यात सुरुवातीला मारहाणीचा गुन्हा दाखल करण्यात आला होता. मात्र, शुभमचा मृत्यू झाल्यानंतर आता या गुन्ह्यात खुनाचे कलम वाढवण्याची प्रक्रिया सुरू असल्याची माहिती पोलिसांनी दिली. मृत्यूची बातमी समजताच पिंपळा परिसरात तणावपूर्ण वातावरण निर्माण झाले.
कायदा व सुव्यवस्था अबाधित राहावी यासाठी उपविभागीय पोलीस अधिकारी नितीन गंगुळे आणि पोलीस निरीक्षक राजेंद्र गुंजाळ यांच्या मार्गदर्शनाखाली परिसरात मोठ्या प्रमाणात पोलीस बंदोबस्त तैनात करण्यात आला आहे. कोणताही अनुचित प्रकार घडू नये यासाठी पोलीस सतर्क असून परिस्थितीवर बारकाईने लक्ष ठेवण्यात येत आहे.
या प्रकरणात आतापर्यंत दोन संशयित आरोपींना अटक करण्यात आली असून आणखी दोन आरोपी फरार आहेत. फरार आरोपींचा शोध घेण्यासाठी पोलीस पथके रवाना करण्यात आली आहेत. या प्रकरणाचा पुढील तपास पोलीस हेड कॉन्स्टेबल योगेश माळी करत आहेत.
निष्पाप तरुणाचा अशा पद्धतीने बळी गेल्याने नागरिकांमध्ये तीव्र संतापाची भावना असून सर्व आरोपींवर कठोरात कठोर कारवाई करण्यात यावी, अशी जोरदार मागणी नागरिकांकडून करण्यात येत आहे.
