विनोद पवार (जळगाव प्रतिनिधी ) : शहरातील निवृत्ती नगर परिसरात वास्तव्यास असलेल्या २८ वर्षीय तरुणाचा विषारी औषध प्राशन केल्याने मृत्यू झाल्याची हृदयद्रावक घटना घडली आहे. हर्षल वासुदेव मोरे (वय २८, रा. निवृत्ती नगर, जळगाव) असे मृत तरुणाचे नाव आहे.
ही घटना शुक्रवार, २४ जानेवारी २०२६ रोजी मध्यरात्री सुमारे १२.०५ वाजण्याच्या सुमारास घडली. हर्षल याने अज्ञात कारणामुळे काहीतरी विषारी औषध सेवन केल्याचे कुटुंबीयांच्या लक्षात येताच त्यांनी तातडीने त्याला उपचारासाठी जळगाव येथील शासकीय वैद्यकीय महाविद्यालय व रुग्णालयात दाखल केले. मात्र डॉक्टरांनी केलेल्या प्रयत्नांनंतरही उपचारादरम्यान त्याचा मृत्यू झाला.
या घटनेची नोंद जिल्हापेठ पोलीस ठाण्यात अकस्मात मृत्यू म्हणून करण्यात आली असून, मृत्यूमागील नेमके कारण शोधण्यासाठी पोलिसांकडून तपास सुरू आहे. महिला पोलीस हवालदार अनिता वाघमारे या पुढील तपास करत आहेत.
या घटनेमुळे परिसरात हळहळ व्यक्त होत असून, मोरे कुटुंबावर शोककळा पसरली आहे.
