विनोद पवार (जळगाव प्रतिनिधी ) : जिल्ह्यातील पाळधी परिसरात मंगळवारी दुपारी एक हृदयद्रावक अपघात घडला. शहरातील काम आटोपून दुचाकीवरून गावाकडे परतणाऱ्या कुटुंबावर भरधाव ट्रकने अचानक काळाचा घाव घातला. या भीषण अपघातात आजोबा आणि त्यांचा लहानगा नातू जागीच ठार झाले, तर दुचाकीवरील एक महिला गंभीर जखमी झाली आहे.
शिंगणगाव–सावदा बायपास रस्त्यावर पाळधी गावाजवळ हा अपघात झाला. MH 05 AM 3248 क्रमांकाच्या ट्रकने समोरून येणाऱ्या दुचाकीला जोरदार धडक दिली. धडकेची तीव्रता इतकी होती की दुचाकीवरील तिघेही रस्त्यावर दूर फेकले गेले.
अपघातानंतर स्थानिक नागरिकांनी तातडीने मदत करत जखमींना जळगाव येथील शासकीय वैद्यकीय महाविद्यालयात दाखल केले. मात्र डॉक्टरांनी देशमुख राठोड आणि त्यांचा नातू परेश राठोड यांना तपासणीनंतर मृत घोषित केले. दुचाकीवरील महिला बेबीबाई राठोड यांची प्रकृती अत्यवस्थ असून त्यांच्यावर अतिदक्षता विभागात उपचार सुरू आहेत.
घटनेची माहिती मिळताच जिल्हा परिषद सदस्य प्रतापराव पाटील यांनी रुग्णालयात भेट देत शोकाकुल कुटुंबीयांचे सांत्वन केले. दरम्यान, अपघातानंतर घटनास्थळावरून पळ काढण्याचा प्रयत्न करणाऱ्या ट्रक चालकाला पोलिसांनी तत्परतेने ताब्यात घेतले असून पाळधी पोलीस ठाण्यात गुन्हा दाखल करण्याची प्रक्रिया सुरू आहे.
या अपघातामुळे परिसरात तीव्र हळहळ व्यक्त होत असून, बायपास रस्त्यावरील वाढते अपघात पुन्हा एकदा चर्चेचा विषय ठरले आहेत.
