जळगाव (प्रतिनिधी विनोद पवार) : राज्य पोलीस दलात मोठ्या प्रमाणावर प्रशासकीय फेरबदल करण्यात आले असून जळगाव जिल्ह्याच्या अपर पोलीस अधीक्षक पदावर संदीप रघुनाथ गावित यांची नियुक्ती करण्यात आली आहे. विद्यमान अपर पोलीस अधीक्षक अशोक नखाते यांची बदली करण्यात आली असून गृह विभागाने शुक्रवारी सायंकाळी यासंदर्भातील आदेश जारी केले.
नवीन अपर पोलीस अधीक्षक संदीप गावित यांचे जळगाव जिल्ह्याशी आधीपासूनच जवळचे नाते आहे. त्यांनी यापूर्वी जळगाव शहरात उपविभागीय पोलीस अधिकारी (SDPO) म्हणून कार्य करताना उल्लेखनीय कामगिरी बजावली होती. त्यांच्या स्थानिक अनुभवामुळे जिल्ह्यातील कायदा व सुव्यवस्था अधिक प्रभावीपणे राखली जाईल, अशी अपेक्षा व्यक्त होत आहे.
दरम्यान, अशोक नखाते यांनी आपल्या कार्यकाळात अनेक गंभीर गुन्ह्यांचा तपास यशस्वीरीत्या पूर्ण करत गुन्हेगारीवर नियंत्रण मिळवले. त्यांच्या कामामुळे जिल्ह्यातील पोलीस यंत्रणेवर नागरिकांचा विश्वास अधिक दृढ झाला होता.
संदीप गावित यांच्या नियुक्तीनंतर आता पोलीस दलाच्या कार्यपद्धतीत सकारात्मक बदल होण्याची शक्यता व्यक्त होत असून, जिल्ह्याच्या सुरक्षेसाठी ते कोणते नवे उपक्रम राबवतात याकडे सर्वांचे लक्ष लागले आहे.
