शिरपूर (प्रतिनिधी तुषार शेटे ) : शिरपूर येथील नामांकित कवयित्री व लेखिका सौ. कविता बाविस्कर यांची मुलाखत आकाशवाणी धुळे केंद्रावर प्रसारित होणार असून, साहित्यप्रेमींसाठी ही एक खास पर्वणी ठरणार आहे. शनिवार, १८ एप्रिल रोजी सकाळी १० वाजता एफएम 100.5 मेगाहर्ट्झवर ‘इंद्रधनुष्य’ या लोकप्रिय सदराअंतर्गत ‘साहित्य सौरभ’ कार्यक्रमात ही विशेष मुलाखत ऐकायला मिळणार आहे.
ही मुलाखत पूनम बेडसे यांनी घेतली असून कार्यक्रमाचे सादरीकरण कविता आत्रम करणार आहेत. अहिराणी व मराठी साहित्य क्षेत्रात उल्लेखनीय कार्य करणाऱ्या कविता बाविस्कर यांनी अनेक कविता व लेखनातून आपली वेगळी ओळख निर्माण केली आहे. विविध काव्य संमेलनांमध्येही त्यांनी प्रभावी सादरीकरण करून रसिकांची दाद मिळवली आहे.
सामाजिक क्षेत्रातही त्या सक्रिय असून विशेषतः मतिमंद, मूकबधिर विद्यार्थी आणि महिलांसाठी त्या कार्यरत आहेत. त्यामुळे त्यांची मुलाखत ही प्रेरणादायी ठरणार आहे.
जगभरातील श्रोत्यांना हा कार्यक्रम ‘News On Air’ ॲपद्वारे मोबाईलवरही ऐकता येणार आहे. त्यासाठी ॲप डाउनलोड करून महाराष्ट्र राज्य निवडून ‘धुळे’ केंद्रावर हा कार्यक्रम ऐकण्याचे आवाहन साहित्यप्रेमींनी केले आहे.
