रुपेश देशमुख (ब्रह्मपुरी प्रतिनिधी) : शेतकरी, शेतमजूर, महिला, विद्यार्थी तसेच सर्वसामान्य नागरिकांच्या महसूल विभागाशी संबंधित समस्या तात्काळ सोडवण्यासाठी राज्य शासनाच्या निर्देशानुसार राबविण्यात येणाऱ्या छत्रपती शिवाजी महाराज महाराजस्व समाधान शिबीर अभियान’चा शुभारंभ शनिवारी (दि.७) ब्रह्मपुरी तालुक्यातील चौगाण येथे प्रांत अधिकारी पर्वणी पाटील यांच्या उपस्थितीत करण्यात आला.
यावेळी तहसीलदार सतीश मासाळ, नायब तहसीलदार लीना बोबाटे, महानंदा मडावी, प्रशांत धकाते, निरीक्षक अधिकारी अमित कांबळे, कृषी अधिकारी स्वाती घुले, सहाय्यक निबंधक मडावी तसेच चौगाणचे सरपंच आणि विविध विभागांचे अधिकारी उपस्थित होते.
या अभियानाच्या माध्यमातून महसूल प्रशासन अधिक लोकाभिमुख, कार्यक्षम आणि गतिमान करण्याचा प्रयत्न करण्यात येत असून नागरिकांना विविध शासकीय सेवा एकाच ठिकाणी उपलब्ध करून देण्याचा उद्देश असल्याचे प्रांत अधिकारी पर्वणी पाटील यांनी सांगितले. शासकीय योजनांचा लाभ सर्वसामान्य नागरिकांपर्यंत पोहोचावा आणि कोणीही लाभापासून वंचित राहू नये, असे आवाहन त्यांनी यावेळी केले.
कार्यक्रमादरम्यान विविध विभागांच्या लाभार्थ्यांना मान्यवरांच्या हस्ते लाभाचे प्रमाणपत्र वितरित करण्यात आले. तसेच उपस्थित नागरिकांच्या समस्या जाणून घेऊन त्यांच्या शंकांचे निराकरणही करण्यात आले. आगामी काळात होणाऱ्या मंडळस्तरीय महसूल शिबिरांमध्ये नागरिकांनी मोठ्या संख्येने सहभागी व्हावे, असे आवाहन तहसीलदार सतीश मासाळ यांनी केले.
या कार्यक्रमाला मंडळ अधिकारी, ग्राम महसूल अधिकारी तसेच विविध विभागांचे अधिकारी व कर्मचारी यांच्यासह सुमारे ५०० ते ६०० नागरिकांनी उपस्थिती दर्शविली. अभियानांतर्गत ७/१२ उतारे अद्ययावत करणे, प्रलंबित फेरफार निकाली काढणे, विविध प्रमाणपत्रांचे वितरण, ई-मोजणी, पीएम किसान योजना, तसेच इतर महसूल सेवांबाबत मार्गदर्शन करण्यात येणार असल्याची माहिती प्रशासनाकडून देण्यात आली.
