Times of Maharashtra Desk: राज्यातील आगामी महापालिका निवडणूक 2026 संदर्भात राजकीय हालचालींना वेग आला आहे. बहुतांश महापालिकांमध्ये भाजप आणि शिवसेना एकत्र निवडणूक लढवणार असल्या तरी पुणे आणि पिंपरी-चिंचवड महापालिकांमध्ये भाजप आणि अजित पवार यांच्या राष्ट्रवादी काँग्रेसमध्ये थेट लढत होणार असल्याची घोषणा मुख्यमंत्री देवेंद्र फडणवीस यांनी केली आहे. मुख्यमंत्री फडणवीस म्हणाले की, “पुणे आणि पिंपरी-चिंचवडमध्ये भाजप आणि अजितदादांची राष्ट्रवादी एकत्र लढू शकत नाही. याबाबत अजित पवार यांच्याशी चर्चा झाली आहे. दोन्ही पक्ष एकत्र आले तर त्याचा फायदा विरोधकांना होईल, हे आम्हा दोघांनाही राजकारण कळतं. त्यामुळे ही लढत मैत्रीपूर्ण असेल.”
अजित पवारांनी दिली प्रतीक्रिया
मुख्यमंत्री फडणवीस यांच्या विधानावर प्रतिक्रिया देताना उपमुख्यमंत्री अजित पवार म्हणाले, “मुख्यमंत्र्यांनी पुणे आणि पिंपरी-चिंचवडबाबत विचार करूनच भाष्य केलं असेल. या दोन्ही महापालिकांमध्ये सत्ता मिळवण्यासाठी मी सगळं पणाला लावणार आहे.”शरद पवार यांच्यासोबत संभाव्य युतीबाबत विचारले असता अजित पवार म्हणाले, “थोडी कळ काढा. आताच निवडणुका जाहीर झाल्या आहेत.” त्यामुळे त्यांच्या भूमिकेबाबत अद्याप स्पष्टता दिसून येत नाही.
पुण्यात काका–पुतण्यांची युती होणार?
महापालिका निवडणुकीचे बिगुल वाजताच पिंपरी-चिंचवडमध्ये काका–पुतणे एकत्र येणार का? याबाबत चर्चांना उधाण आले आहे. अजित पवार गटाचे निवडणूक प्रमुख नाना काटे आणि शरद पवार गटाच्या कोअर कमिटीचे सदस्य सुनील गव्हाणे यांची महत्त्वाची बैठक पार पडली. दोन्ही राष्ट्रवादी गटांमध्ये ही पहिलीच औपचारिक चर्चा मानली जात आहे.नाना काटे यांनी सांगितले की, “काही दिवसांपूर्वी सुप्रिया सुळे यांनी मला फोन करून पिंपरी-चिंचवडमध्ये मतविभाजन टाळण्याचा सल्ला दिला होता.” ही बैठक अजित पवार आणि सुप्रिया सुळे यांच्यासह वरिष्ठ नेत्यांच्या सूचनेनुसारच घेण्यात आल्याचेही स्पष्ट करण्यात आले.
महापालिका निवडणूक वेळापत्रक
- नामनिर्देशन अर्ज स्वीकारणे: 23 डिसेंबर ते 30 डिसेंबर
- अर्ज छाननी: 31 डिसेंबर
- उमेदवारी माघार: 2 जानेवारी
- चिन्ह वाटप व अंतिम उमेदवार यादी: 3 जानेवारी
- मतदान: 15 जानेवारी
- निकाल: 16 जानेवारी
पुणे आणि पिंपरी-चिंचवड महापालिका निवडणूक यंदा बहुरंगी आणि अत्यंत चुरशीची ठरण्याची चिन्हे दिसत असून, आगामी काळात राजकीय समीकरणे अधिक स्पष्ट होण्याची शक्यता आहे.
